Sang Hyang Tattwajñāna

||om|| Oṃ awighnam astu|| namaḥ siddham|| om||

Nihan kayatnākna de sang sewakadharmma sang mahyun luputeng janmasaṃsāra| hana sang hyang tattwajñāna ngaranira| ya tika kawruhaknanta rumuhun lawanika dewatānya| enak pwa wruh ta ring sang hyang tattwajñāna| niyata sira tumon janmasangsāra mwang mantuka ri sangkanya|| aparanika sinanggah sang hyang tattwajñāna ngaranira| sugyan mangkana linga sang para, anam pih sang hyang tattwajñāna ngaranira anung pinakabungkah ning tattwa kabeh| ndya lwirnya nihan||1

cetana acetana| cetana ngaranya jñāna wruh mengĕt ring tutur tan pabalik lupa| acetana ngaranya ikang lupa wyāmoha tan kahanan tutur|| ikang cetana lawan acetana yeka sinangguh śiwatattwa lawan māyātattwa| ikang cetana yeka śiwatattwa| ikang acetana yeka māyātattwa| paḍa litnya mwang sūkṣmanya| kunang kasor nikang māyātattwa de ning śiwatattwa| tan pacetana tan pajñāna ikang māyātattwa| kewala lupa tan kahanan tutur taya pinakāwaknya| awangwang uwunguwung tan pagamongan lupa wiparīta swabhāwa nikang māyātattwa|| tutur prakāśa pwa swabhāwa nikang śiwatattwa| ikang sinangguh śiwatattwa tiga prabhedanya| lwirnya|| paramaśiwatattwa sadāśiwatattwa ātmikatattwa|| 2

paramaśiwatattwa ngaranya kasthityan bhaṭāra ring niṣkala| tan polah tan limbak tan laku tan hili tan pasangkan tan paparan tan pawitan tan pawkasan| kewala sthiti umingĕng humnĕng langgĕng juga sira| ibĕk tang rāt kabeh de nira| kakasut kahma kawyāpaka kabeh kang saptabhuwana de nira| saptapātāla suṇḍul wuntu| sasĕk pnuh lyab kang jagat de nira| tan kawnang linongan tan kawnang tinambĕhan| niṣkāryya niṣprayojana juga sira| tan para wyāpāra ring halahayu| nirhuninga ta sira ika kabeh| mwang tan hana ng tītānāgatawarttamāna ri sira| tan kahhlĕtan sira de ning kāla| rahina sadā juga sira| tanpa kahilangan lanā juga sira| nahan lakṣaṇa bhaṭāra paramaśiwatattwa| yeka kasthityan bhaṭāra ring niṣkala ika| sira ta bhaṭāra paramaśiwatattwa ngaranira|| 3

nihan sadāśiwatattwa ngaranira| wyāpāra ta bhaṭāra sadāśiwatattwa| wyāpāra ngaranya kinahanan sira de ning sarwwajña mwang sarwwakāryyakarttā sira| sarwwajña sarwwakāryyakarttā ngaranya| anam pih| hana padmāsana palunggahan bhaṭāra caduśakti ngaranya| lwirnya|| jñānaśakti wibhuśakti prabhuśakti kriyāśakti| nahan tang sinanggah caduśakti ngaranya|| jñānaśakti ngaranya tiga prabhedanya| lwirnya| dūrada[śa]rśana dūraśrawaṇa dūrātmaka|| dūrada[śa]rśana ngaranya tumon ing adoha paṛk | nahan ta ng sinangguh jñānaśakti ngaranya|| wibhuśakti ngaranya tan hana katunanira irikang rāt kabeh|| prabhuśakti ngaranya tan kalangghanan ri sakecchā nira|| kriyāśakti ngaranya sira humanak ikang rāt kabeh nguni weh ikang watĕk dewatā kabeh| kady anggan ing brahmā wiṣṇu īśwara pañcaṛṣi saptaṛṣi dewaṛṣi indra yama waruṇa kubera waiśrawaṇa widyādhara gandharwwa dānawa daitya rākṣasa bhūta yakṣa bhūta dĕngĕn bhūtakāla bhūtapiśāca| nguni weh ikang bhuwana pṛthiwī āpah teja wāyu ākāśa candra āditya tārāgaṇa| yeka gawe bhaṭāra sadāśiwatattwa ring niṣkala ika kabeh|| kunang gawe bhaṭāra sadāśiwatattwa ring sakala| sang hyang śāstra āgama aji waidya tarkka wyākaraṇa gaṇita yatika gawe bhaṭāra sadāśiwatattwa| an sira pramāṇa irikang rāt kabeh sira makadṛwya irikang sakala niṣkala| sira ta bhaṭāra ādipramāṇa ngaranira| sira ta bhaṭāra jagannātha ngaranira| sira ta bhaṭāra makāraṇa ngaranira| sira ta bhaṭāra parameśwara ngaranira| sira ta bhaṭāra guru ngaranira| sira ta bhaṭāra mahulun ngaranira| sira ta mangaran bhaṭāra waśawaśitwa| ika ta kabeh| sirāgawe tan ginawe| sira ta wnang manghanākĕn wnang manghilangakĕn| tan hana lumwihana kaiśwaryyanira| sira ta bhaṭāra guru ning guru| nahan ta lakṣaṇa bhaṭāra sadāśiwatattwa|| 4

nihan tang sinangguh ātmikatattwa ngaranya| bhaṭāra sadāśiwatattwa kunang lakṣaṇahanira| ūtaprota| ūta ngaranya kadyanggan ing puy hana ringĕsĕyĕn| sūkṣma juga kangpuy hana ring kayu pring| mangkana ta bhaṭāra sadāśiwatattwa an wyāpaka ring māyātattwa| tan katon tan kinawruhan| sira wibhu hunibĕki ng māyātattwa| prota ngaranya kadyanggan ing maṇik sphaṭika āhrhnang hamāyamāya trusalilang tan kāwaraṇan| raktākna irikang warṇṇa| dadi masalin warṇṇa ikang maṇik sinaput de nikang warṇṇa rakta ring māyātattwa| tan katon tan kinawruhan| sira sira wibhu humibĕki ng māyātattwa sinaput de nikang warṇṇa raktanya jugekang maṇik| makanimitta pasahakna ikang maṇik lawan warṇṇa| ndan irika mulih rūpa nikāīnghna | ikang warṇṇa raktanya ngūni hana ri kāwaknya jugeka wkasan|| kadi mangkana ta bhaṭāra sadāśiwatattwa an wyāpaka cumetanekang māyātattwa| mala pwa swabhāwa nikang māyātattwa| ya ta sinangguh kopaṛngga karaktan mala ngaranya| matangnyan kadi hilang kahiḍĕpanya śakti bhaṭāra wkasan| kintu taha| apan sphaṭikopama ktang bhaṭāra sadāśiwatattwa tan wnang cinampuran| tuhun cetana nira juga karaktan mala| kopaṛnggan sinaput de nikang māyātattwa| kawkas tang cetana lngĕlngĕ | mari sarwwajña mari sarwwakāryyakarttā| tuhun makāwak tuturmmātra| juga kang cetana wkasan| ndan sira ta sinanggah ta ātmikatattwa ngaranira| sira ta sang hyang ātmā wiśeṣa ngaranira| sira ta bhaṭāra dharmma ngaranira| sira ta humibĕki ng rāt kabeh| sira ta pinakahuripi ng rāt kabeh sarwwajanma kabeh| nahan papaḍanira kady anggan ira sang hyang āditya| tunggal sira tka wyāpāra ring abhyantara| tuhun teja nira juga lumrā mahasing daśadeśa| humibĕki ng rāt kabeh tumeja ning halahayu abo lawanawangi| ikang teja tumeja ning halahayu abo lawanawangi| ikang teja tumeja ning halahayu akweh gawe ning teja sang hyang āditya| hana maring hala hana maring hayu hana maring abo hana maring awangi hana maring rūpawarṇṇa| tlas karuhun sang hyang āditya| sarwwecchā sang hyang āditya juga sira hana ring abhyantara|| mangkana ta bhaṭāra dharmma tuhun hana ring niṣkala juga sira makāwak ikang turyyapada| tuhun cetana nira juga lumrā humibeki ng rāt kabeh| matmahan saṃśaya gaṇal pinakahurip ning sarwwajanma kabeh| māyā ta sinangguh cetana mañetana ngaranya|| 5

nihan praṣṭawan bhaṭāra dharmma anung mṛddhyakĕn cetana nira| bhaṭāra mahulun sira mahyun manon wastu sakala| ya ta matangnyan inicchā nira ta sang hyang ātmā pinatĕmwakĕn ira lawan pradhānatattwa| pradhānatattwa ngaranya anak ning māyātattwa| ya ta matangnyan lupa wiparīta swabhāwa nikang pradhānatattwa| turu ngaranya ring mānuṣa| lupa pwāwak ning pradhānatattwa| tutur prakāśa pwāwak sang hyang ātmā| ikang tutur matmu lawan lupa ya ta sinangguh pradhānapuruṣa ngaranya| ri pamanggih ikang pradhāna lawan puruṣa ika ta yan pānak citta lawan guṇa| citta ngaranya gaṇal ning puruṣa| guṇa ngaranya dadi ning pradhānatattwa| an kacetana de ning puruṣa| ikang guṇa tiga prabhedanya| mapalenan lwirnya| sattwa rajah tamah| yeka sinangguh triguṇa ngaranya| ya ta pinakaguṇa de ning citta| nahan tang citta sattwa citta rajah citta tamah|| 6

citta ngaranya cetana sang puruṣa karaktan kopaṛngga de ning triguṇa| citta ngaranya wkasan| lakṣaṇanya kengĕtakna|| yan sattwa prakāśa rumakĕt irikang citta yeka prājña widagdha wruh ri yogya lawan tan yogya akamulyan denyāmawāmbĕk ahadyan tngĕn| tan guragaḍa tan babakujar| bhakti tonan dugaduga asih ta ya ring kasyasih anumoda ring hīnadīna tuneng sungsut satyabhakti arumpating halanya| saumya wacananya atĕn ta ya ngucap śāstra kamuni wacananya| utsāhāngusing guṇa pangwruh kasamyagjñānan| tan pamali nghela tan kneng sungmut| kewala buḍah patinghananya| sapolahnya mangdadyakĕn harṣa ring sang tuminghal| śabdanya mangdadyakĕn karṇṇamanohara ring sang mangrangö| maharddhika pahambĕkanya mangdadyakĕn tṛpti parituṣṭa ring citta ning para| masor ta ya ring abhiprāya| manggā kociwahā| tan keponumahār sukhāmbĕk ning para| tatan ahangkāra tan moha denyāmawa prawṛtti| kewala buḍah śāntālilaṃ ahning nirāwaraṇa tan patalutuh| atah pinakajñānanya aśrī patinghalanya| yeka wyakti nikang citta sattwa| nihan lakṣaṇa nikang citta sattwa an rumakĕt irikang citta|| 7

nihan lakṣaṇa nikang citta rajah an rumakĕt irikang citta| cañcala adṛs molah aśīghra panasbhāran| aglis bangga īrṣyā salahhāsa sāhasa capala wawang tka sāhasa tunengasih tuneng wlasih kumalwihakĕn awak guṇa göng hati krodhanya göng gĕ sungsut ahangkāra lobha dambha krūra tar atakut kabhinawa sapolahnya mangdadyakĕn kṛs ning tuminghal| śabdanya mangdadyakĕn karṇṇaśūla ring sang mangrĕngö| alangghya ruhur pāmbĕkanya mangdadyakĕn hewa ning citta ning para| tan angga korurwā tan angga sor ring abhiprāya| yeka wyakti nikang citta rajah an rumakĕt irikang citta|| 8

nihan lakṣaṇa ning citta tamah an rumakĕt irikang citta| abĕyĕt almĕh guhya simpnĕh kaluṣa amangna tan anghel atīs arip bot turu gĕng mūḍha gĕng rāga gĕngelik gĕng hyun gĕng wiṣaya dṛḍha ta ya śuklaśoṇita mapulang maturu lawananak rabinya| mangkana wyakti nikang citta tamah| nahan lakṣaṇa ning citta tamah an rumakĕt irikang citta|| 9

ikang sattwa rajah tamah rumakĕt irikang citta yeka nimitta ningātmā na patmah tmahan|| nihan kramanya kengĕtakna| yan sattwa kewala prakāśa göng irikang citta yeka nimitta ning ātmā mamanggih kamokṣan| apan ikang sattwa gumawayakĕn rasa ning āgama| sa utsahāha prayatna lumkasakĕn krama ning kasamyagjñānan|| yan patmu ikang sattwa lawan rajah prakāśa göng irikang citta| yeka nimitta ning ātmā para ring swargga| apa nikang sattwa mahyun magawaya hayu| ikang rajah manglakwakĕn sumiddhākĕn saprayojana ning sattwa| nahan yukti nikang rajah| milwawakang swargga keṇḍit de ning sattwa|| ya pwa nikang sattwa patmu lawan rajah tamah prakāśa göng irikang citta yeka nimitta ning ātmā mangdadi mānuṣa| apa nikang sattwa rajah tamah tan patūt kirakiranya| tāgawe hayu tānganakĕn dharmma puṇya yajña| ling nikang sattwa|| krodhāglṛ angaku| ling nikang rajah|| guhya lmĕh| tāmangan haturu juga| ling nikang tamah|| mangkana kirakira nikang sattwa rajah tamah| tan patut mapalang pangan ya ta matangnyan tan hana kriyā halahayu kadadi denya salah sawiji| nahan yukti nikang mangdadi mānuṣa ika sang hyang ātmā| mangkana lakṣaṇa nikang triguṇa rumakĕt irikang citta| ri pamangguh ning triguṇa lawan citta mtu tang buddhi| lakaṣaṇa ning buddhi| buddhi tan pahingĕp| ikang buddhi ndan ahingĕp ya| kadi tan wruh ikang buddhi| ndan wruh ya kadi tanpa cetanekang buddhi| ndan cetana ya sangkṣepanya lngĕlngĕ sthita humidĕng lṛmĕng| mengĕt ring halahayu jugekang buddhi| apa kari sinangguh buddhi ngaranya| e nihan pih| gaṇal ning triguṇa kacetana de ning citta| yeka sinangguh buddhi ngaranya| sangka ning buddhi mtu tangahangkāra| ahangkāra ngaranya gaṇal ning citta| ya ta sinangguh cetana mañetana ngaranya| apa dumeh yan mangkana| apa nikang cetana sangśaya gaṇal swabhāwanya| ya ta matangnyan akweh prabheda ning tutur| agaṇal alit swabhawa ning tutur|| 10

nihan kramanya kengĕtakna| bhaṭāra mahulun makacetana sang hyang ātmā| sang hyang ātmā makacetana ikang citta| ika citta makacetana ikang ahangkāra| ya ta inaweśa de ning kriyāśakti bhaṭāra mapramāṇa| ya ta sinangguh hurip ni hurip ngaranya kriyāśakti bhaṭāra pramāṇa mwang pinakahurip ning ahangkāra pinakahurip ning buddhi| ya ta matangnyan pramāṇa ngaranika ahangkāra waneh| apan mangku mamastuni ring hana lawan nahan| manglakasakĕn kāryya halahayu juga guṇa nikang ahangkāra mwang mangku sarwwadṛbya| lingnya dṛbyangku bayungku śabdangku ingĕtku śarīrangku| mangkana ling nikang ahangkāra| ikang ahangkāra lawan buddhi ya pramāṇa wiśeṣa ngaranya| apa dumeh ikang ahangkāra lawan buddhi sinangguh wiśeṣa ri denya sthiti humiḍĕng tan polah| tuhun tutrmmātra lmĕng mengĕt ring halahayu jugekang buddhi| tuhun pinakaparanti jugeka hananya de ning ahangkāra tri bhedanya| lwirnya| si waikṛta si taijasa si bhūtādi| nahan ya ahangkāra|| ahangkāra si waikṛta yeka buddhi sattwa| ahangkāra si taijasa yeka buddhi rajah| ahangkāra si bhūtādi yeka buddhi tamah|| 11

gawenya yeki wuwusĕn| ahangkāra si waikṛta yeka magawe manah mwang daśendriya| lwirnya| cakṣu śrotra ghrāṇa jihwā twak| nahan tang sinanggah pañcendriya ngaranya| wāk pāṇi pāda upastha pāyu yeka sinanggah pañcakarmendriya ngaranya|

papiṇḍa nikang pañcendriya lawan pañcakarmmendriya yeka sinanggah daśendriya ngaranya| kasawlas manah| nahan gawe nikang si waikṛta ahangkāra|| kunang ikang ahangkāra si bhūtādi yekāgawe pañcatanmātra| lwirnya| śabdatanmātra sparśśatanmātra rūpatanmātra rasatanmātra gandhatanmātra|| śabdatanmātra ngaranya tutupi talinganta kalih| hana śabda kaṛngö| lit nikang śabda yeka śabdatanmātra ngaranya|| sparśśatanmātra ngaranya hana wāyu madṛs barat prahāra kunang| maṛn pwekang wāyu| lit nikang sumilirumĕrsöng pakulit yeka sparśśatanmātra ngaranya|| rūpatanmātra ngaranya duwĕgi kālasndhyā sumurup sang hyang āditya kulwan| hana ta tejanira kawkas mātramātra| lit nikang teja yeka rūpatanmātra ngaranya|| rasatanmātra ngaranya| kadyangga ning amangan ṣaḍrasa| tlas pwāmangan hana ta ya śeṣanya mātra kawkas ring liḍah| lit nikang rasa yeka rasatanmātra ngaranya|| gandhatanmātra ngaranya kadyangga ning ambung wangiwangi candanāgaru kunang| lunghu tang wāsa kweh rika hana ta ya śeṣa nikang gandha ring irung ya ta hinambung rinasan| lit nikang gandha yeka gandhatanmātra ngaranya|| 12

sangka ring pañcatanmātra mtu ta ng pañcamahābhūta| ākāśa mtu saking śabdatanmātra| hawangawang huwunguwung tan pagamongan mweh awan lakṣaṇanya śabda pinakaguṇanya|| wāyu mtu saking sparśśatanmātra| ri wut pata barat prahāra angulahakĕn lakṣaṇanya sparśśa pinakaguṇanya|| teja mtu sakaring rūpatanmātra| prakāśa paḍa apanas pinakalakṣaṇanya rūpa pinakaguṇanya|| āpah mtu sakaring rasatanmātra| amlṛs lakṣaṇanya ṣaḍrasa pinakaguṇanya|| pṛthiwī mtu saking gandhatanmātra| ākāśa gaṇal lakṣaṇanya gandha pinakaguṇanya| ikang gandha tiga prabhedanya| surabhi asurabhi sa ca gandhasādhāraṇah| surabhi nga awangi| asurabhi nga abo| sa ca gandhasādhāraṇah ikang tan awangi tan abo nga| nahan ta lakṣaṇa nikang pṛthiwī| yeka pamkas ning tattwa ganal| ikang pṛthiwī āpah teja wāyu ākāśa ya ta ginawe bhuwana de bhaṭāra| arddha ruhur sumiṇḍuhur matumpangtumpangan lakṣaṇanya| ikang tattwa i ruhur pinakaguṇa de ning tattwa i sor|| nihan lakṣaṇanya| ikang ākāśa mungwing ruhur| tumūt ta ng wāyu|ya ta matangnyan ro guṇa ning wāyu śabda sparśśa|| ākāśa wāyu teja| ya ta matangnyan tiga guṇa ning teja śabda sparśśa rūpa|| ākāśa wāyu teja āpah| ya ta matangnyan pāt guṇa ning āpah śabda sparśśa rūpa ṣaḍrasa|| ākāśa wāyu teja āpah pṛthiwī| ya ta matangnyan lima guṇa ning pṛthiwī śabda sparśa rūpa ṣaḍrasa gandha|| 13

nahan laksaṇa nikang pañcamahābhūta an pawor guṇa| ginawe aṇḍabhuwana de bhaṭāra| lwirnya| saptaloka pamkas mungwang i ruhur| tumūt ta ng saptapātāla mungguh i sor| bhuwanaśarīra ngaranya| satyaloka munggw ing ruhur| i sornya mahāloka| i sornya janaloka| i sornya tapoloka| i sornya swarlloka| i sornya bhuwarlloka| i sornya bhūrlloka|| ndan ikang bhūrlloka patimbuna ning tattwa kabeh| ngka ri bhūrlloka saptaparwwata saptārṇṇawa saptadwīpa daśawāyu daśendriya| ngkāna pwa samoha ngke bhūrlloka ika kabeh|| ikang saptaparwwata pṛthiwī rakĕtnya ngke bhuwanāntara|| ikang saptārṇṇawa āpah rakĕtnya ngke bhuwanāntara|| ikang saptadwīpa teja rakĕtnya ngke bhuwanāntara|| ykang daśawāyu wāyu rakĕtnya ngke bhuwanāntara|| ikang daśendriya ākāśa rakĕtnya ngke bhuwanāntara|| nahan lakṣaṇa nikang sarwwatattwa pasamoha ring bhūrlloka|| nihan ta ng saptapātāla ngaranya| pātāla waitala nitala mahātala sutala talātala rasātala| i sor ning saptapātāla balagarddabha mahānaraka| i sor nni mahānaraka ngkāna ta nggwan sang kālāgnirudra apwi dumilah sadākāla| satusiwu yojana dilahnya mangaladalad sang hyang kālāgnirudra apuy pinakangasa ning saptapātāla| mangkana lakṣaṇa ning aṇḍabhuwana| kapwa matumpangtumpangan kadi tala ning tawwan ikang tattwa gaṇal| samangkana kwehya gawe nikang ahangkāra si bhūtādi mūla nika|| 14

kunang lakṣaṇa nikang ahangkāra si taijasa| yeka kadi wayuh lakṣaṇanya| tumulung si waikṛta lawan si bhūtādi milu magawe ekādaśendriya lawan pañcatanmātra|| kunang ikang ahangkāra tiga lakṣaṇanya mtu sakaring buddhi ya ta umupagama irikang sattwa rajah tamah| syapa karika mangupagama| sang hyang pramāṇa ngaranira gaṇal sang hyang ātmā hana ring tūryyapada| sira sang sinanggah sang hyang pramāṇa ngaranira sira ta mangaku mamastwani lumkasakĕn kriyā halahayu| kunang ikang buddhi manah ahangkāra sḍĕng pinakasādhana sang hyang pramāṇa mangaku manglkasakĕn kriyā kāryya halahayu|| mangkana lakṣaṇa sang hyang pramāṇa makasādhana ikang buddhi manah ahangkāra|| mapa kari bheda ning pramāṇa lawan wiśeṣa| nda nihan ro bhedanya| paḍa ātmā sira kalih kunang rwa bhedanya| kasor sang hyang pramāṇa dening wiśeṣa| wyāpāra ring halahayu sang hyang pramāṇa| kunang sang hyang wiśeṣa tan wyāpāra niṣkāryya niṣprayojana nihungninga sira ring halahayu| kewala sthiti humiḍĕng tan polah tan limbak tan laku tan hili| mangkana lakṣaṇa sang hyang pramāṇa wiśeṣa magaṇalalitika| mangkana kang sinanggah pramāṇa tahampih| paḍātmā sira kalih| ikang pada juga maprabheda| saṃśaya gaṇal pinakinggwan sang hyang ātmā| ya ta tinut nikang ātmā| magaṇalalit swabhāwa ning ātmā| ikang ātmā hana ring tūryyapada ya yatah pramāṇa wiśeṣa kojaranira| mungguh pwa hyang ātmā ring jāgrapada ya yatah pramāṇa kojaranira munggah pwa sang hyang ātmā ring suptapada| nahan wastunya ngaran sang hyang ātmā sthiti humiḍĕng ika ta sinanggah wiśeṣa ngaranya| sang hyang ātmā wyāpāra mamastwani ika ta ng sinangguh pramāṇa ngaranira| mangkana lakṣaṇa sang hyang ātmā ring sapadapada pramāṇa wiśeṣa juga sira| mapa kari dumeh ikang ahangkāra sinanggah pramāṇa| ri denya n pinakasādhana ring mangku mamastwani juga sira| kunang nimitta ning kadi sapatiga arakwa lwir nikang buddhi| ikang ahangkāra tiga prabhedanya maparanti rikang buddhi| ya tiga wṛddhi mānak limang puluh| limang puluh wṛddhi mānak sātus| sātus wṛddhi mānak sewu| sewu wṛddhi mānak tan kinawruhan wilangnya| yeka nimitta ning ātmā patmahtmahan|| 15

mapa kari yukti nikang sattwa rajah tamah| an patmahtmahan maputĕra ring swargga naraka mānuṣa triyak [tiryak]|| sugyan mangkana linga sang para| ndan nahan pih| ikang ahangkāra tiga prabhedanya| maparanti rikang buddhi| hana buddhi sattwa hana buddhi rajah hana buddhi tamah| ya ta tumutakĕn sakāpti ning yoninya pinakajanmanya| wruh pwa sang nipuṇatattwa an mangkana kramanya| ya ta matangnyan kawruhan ikang ikang yoni mangdadyakĕn kamokṣan lawan swargga nguni weh ikang janma waluywaluy| nihan kramanya kengatakna|| yapwan ana buddhi sattwa tībra ri kalinga ning kaprajñān mungsing śāstra molahakĕn kasamyagjñānan| sang hyang tripuruṣa yoni ning sattwa yan mangkana|| yapwan ana buddhi sattwa tībra ri kalinga ning brata tapa yoga samādhi| pañcaṛṣi yoni ning sattwa yan mangkana|| yapwan ana buddhi sattwa tībra ri kalinga ning pūjārccaṇa japa mantra mwang kastutyan bhaṭāra| saptaṛṣi yoni ning sattwa yan mangkana|| yapwan ana buddhi sattwa tan pangiwö halahayu| asih ta ya ring sarwwaprāṇa| dewaṛṣi yoni ning sattwa yan mangkana|| yapwan ana buddhi sattwa tībra ri kalinga ning kawanin kadhīran kaśūran| tan maling bhaya jīwita parityāga ring huripnya mangga umatya humalahakĕn śarīranya makanimittāsihnya bhaktinya| rasika tan wyāmoha denyamawa prawṛtti| kewala śāntacitta alilang juga manahnya| yan gaweyakĕn kadhīran kawanin| widyādhara yoni ning sattwa yan mangkana|| yapwan ana buddhi sattwa tībra ri kalinga ning kalangön harṣa ta yang ṛngö hunyahunyan mangdadyakĕn karṇṇamanohara langödṛḍha ta ya ring higĕl kidung dṛha ta yācangkrama asing ramya mangö pinaranya harṣa ta ya manon skar wangiwangi| gandharwwa yoni ning sattwa yan mangkana|| yatika tan pakabhūminĕn de ning samyagjñāna yan pangusir kamokṣapadan| kunang ikang yogya pakabhūminĕn de ning kasamyagjñānan| kapanggihan ing kamokṣan de sang ṛṣi dewaṛṣi saptaṛṣi pañcaṛṣi makādi sang hyang tripuruṣa| nahan ta ng buddhi sattwa kaniṣṭha madhyamottama|| 16

buddhi rajah yekā wuwusĕn| hana buddhi rajah wineh śabda tan yogya| hanekang krodha kunang tapwan wnang mangrĕt| tan kawtu ning wijil henya| makanimitta hana kalinga ning para ya ta matangnyan mwang juga| humikĕl swaśarīranya| sakaring sĕknya ri hatinya| drawa ta ya mijil matmahan tangis| dānawa yoni ning rajah yan mangkana| hana buddhi rajah wineh śabda tan yogya| hanekang krodha kunang tapwan humnĕng juga ya mne ta ya ring kadohan| ujar ta ya| lingnya| adhikāra denanu wnangaweh śabda tan yogya iryyaku kady angawangawĕdya sakārĕpnya kunang tapwan lmĕh ring wāda jugaku ahataku ring ayungku| daitya yoni ning rajah yan mangkana|| hana buddhi rajah wineh śabda tan yogyakabahan kumtĕr śarīranya wawangaparāga| wākcapala hastacapala pādacapala mangrik masinghanāda mujarakĕn samenakeriya tan panggalṛng linga ning para| rākṣasa yoni ning rajah yan mangkana|| nihan tattwanya rākṣasa pinakahyang ning khadga gamangaman sang prabhu| salwir ning khadga warttamāna pangalap hurip rākṣasa pinakadewatānya|| daitya pinakahyang ning khadga pinakagamangaman wwang tani kadyangga ning luke pṛkul| salwir ning khadga pinakasādhana ning amijilakĕn kamopajīwa daitya dewatānya|| dānawa pinakahyang ning khadga pinakagamangaman sang wiku kadyangga ning pamiso kartrī karayu dānawa dewatānya|| nahan tang buddhi rajah kaniṣṭha madhyamottama|| 17

buddhi tamah yeki wuwusĕn| hana buddhi tamah tan harohara ring pinangan warĕg de ning gangan saktĕs sgĕ sawpĕl twak satahapan parituṣṭa manahnya de nika| bhūta yakṣa yoni ning yan mangkana| deśanya munggwing no| pinakahyang ning dhātu munggwing linga pratimā linggir pamūjamūjān|| yapwanan buddhi tamah hapilih ring pinangan| tan samās ri kaharĕpnya| hadiding tan dĕlanya irangirangan tan dṛpa tan sanggraha manahnya| yan amanggih bhoga atīs ta ya manahnya| bhūta dĕngĕn yoni ning tamah yan mangkana| deśanya mungnggwi wanglu karameyan| pinakadewa ning kayu banaspati|| yapwanan buddhi tamah rāmpadan ya ta ring pinangan| tan apilih ri sakārĕpnya|| salwi ning māngsa sinanggah campur pinanganya ika kabeh lamun warĕg juga lingnya| bhūta kāla yoni ning tamah yan mangkana| deśanya mungwing sma watĕs pamanggahan catuṣpatha|| yanan buddhi tamah tan anggāmangan tan enak| ya ta nimittanya haruhara wkasan| kabarat katimur| tan pamalinghel wruh ta ya paracchidra ri dṛbya ning len| makanimitta yālmĕh mangela hana dudū kalmah| dṛpa ta ya ring tañjakan| anguping juga talingnya an pangrĕngö bhoga| bhūta piśāca yoni ning tamah yan mangkana| deśanyāngambara| alakulaku ta polah| yeka sinangguh sasabāwuh| ling ning loka|| nahan tang buddhi tamah kaniṣṭha madhyamottama|| ikang sattwa rajah tamah nimitta ning ātmā patmahtmahan| nahan kramanya kengĕtakna|| 18

yan patmu ikang bhūtayakṣa lawan dewa dewaṛṣi saptaṛṣi pañcaṛṣi tripuruṣa prakāśa göng irikang buddhi| yeka nimitta ning ātmā mamanggih kamokṣan|| kunang ikang bhūtadĕngĕn daityamātra patmu lawan daitya widhyādhara dewatā prakāśa göng irikang buddhi| ya nimitta ning ātmā mamanggih swarggā|| kunang irikang bhūtakāla patmu lawan rākṣasa gandharwwa prakāśa göng irikang buddhi| yeka nimitta ning ātmā dadya mānuṣa|| kunang ikang bhūtapiśāca matmu lawan rākṣasa prakāśa göng irikang buddhi| yeka nimitta ning ātmā tibeng naraka|| kunang ikang yan bhūtapiśāca kewala prakāśa göng irikang buddhi| yeka nimitta ning ātmā dadya triyak|| nihan kengĕtakna wyangga muwah nimitta ning sang hyang ātmā mapalenan| sangśaya gaṇal sang hyang tripuruṣa| tripuruṣa ngaranya bhaṭāra brahmā wiṣṇu īśwara| sira ta pinakādisattwa| ika tang ādisattwa yan pramāda kurang yoga pañcaṛṣi tmahanya| pañcaṛṣi kurang yoga saptaṛṣi tmahanya| saptaṛṣi kurang yoga dewaṛṣi tmahanya| dewaṛṣi kurang yoga dewatā tmahanya| dewatā kurang yoga widyādhara tmahanya| widyādhara kurang yoga gandharwwa tmahanya| gandharwwa kurang yoga dānawa tmahanya| dānawa kurang yoga daitya tmahanya| daitya kurang yoga rākṣasa tmahanya| rākṣasa kurang yoga bhūtayakṣa tmahanya| bhūtayakṣa kurang yoga bhūtadĕngĕn tmahanya| bhūtadĕngĕn kurang yoga bhūtakāla tmahanya| bhūtakāla kurang yoga bhūtapiśāca tmahanya| bhūtapiśāca kurang yoga mānuṣa tmahanya| ikang mānuṣa tan kinahanan de ning jñānaśakti apan patimbunan ing halahayu| hamaḍa dewatā ring mānuṣaśakti limpad kalingan jugekang watĕk dewatā| mānuṣa kurang yoga triyak tmahanya| kalima prakāra ning triyak| pāśu ya dadi ring wanwa| mṛga ya dadi ring alas| pakṣī ya dadi ring sarwwamĕr| mīna ya dadi ring bañu| pipīlikā ngaraning sattwa manglakulaku ḍaḍanya| tani kinawruhan ngaranya waneh| yeka ikang sinangguh sarwwa kumilip ngaranya| sarīsṛpa kang lumakwi ḍaḍanya| sthāwara ngaranya molah ring ungwan| lumaku kang nglurumur| nahan tmahan sang hyang ātmā yan mānuṣa pramāda kurang yoga|| 19

sasharah| tan pahingan kaṣṭa kāsyasih sang hyang ātmā| tĕhĕr lĕlĕb hilang tan waluy ring jātinya| kadi tan pahiḍĕpan sang hyang ātmā| paḍa nira| kady angga ning wiji ning jawa sawiji| sĕsĕban ta ya para sewunĕn| lbokana ring samudra| atyanta juga kawanggihanya ring jātinya jawa| mangkana ta sang hyang ātmā| yan sāmpun dadi triyak| lĕhĕngan ya ikang dadi paśu| apan ya wnang pinakasādhana ning mangawe hayu| ikang dadi pipĕlikā| kady angga ning tĕtĕk lintah| widat| warayang| hirispoh| salwira ning kinelikan de mānuṣa| pisaningu yan kolahan| lawan ta waneh| ikang triyak| hana kinawedyan| hana kinelikan| mapa ta kalinganya| ikang karmma hala| kaniṣṭha| madhyamottama| hatingkah| apa ta kaniṣṭha ning magawe hala| ikang wong kaluputan dening krodhanya| dadi sāhasa| capala| mangkana ta wyangamuktya pagawenya hala| ya ta tibā ning naraka| hĕntasnya sangkerika| yeka wineh dadi mānuṣa de sang yamabala| tan paḍa rūpanya lawan sang sādhu| yeka wikārajanma ngaranya| kahanan cheda| salwir ning cheda| makaphala ning kaniṣṭha dening gawenyāla|| 20

nihan ikang wwang| madhya denyāgawe hala makanimitta dening kāsyasihnya| tanana panganĕnya saṇḍangĕnya| mangkana kāraṇanyāgawe hala| lumaku maling parachidra ning drĕbya sang sādhu| sakāraṇanya mangana| pjah pwa ya masurung ulahnya mangkana| dumunung ta ya ring naraka| hĕntasanya sangke naraka| wineh ta ya dadi triyak de sang yamabala| ndan ikang triyak kang wnang pinangan| wnang pinangan pinakasādhana ning agawe yajña tawur| wineh mangkana wāsanānya| nahan madhya ning phala ning gawenya hala|| 21

nihan uttama ning gawenya hala| nda makanimittan dening ahangkāranya| dening lobhanya| dening mohanya| dening dambhanya mwang hiriṣyajñā[nya dwng]| tan pawanĕhan tuhu lĕtuh ning jñānanya| porapuri denya magawe hala| hamrang wong tan padoṣa| hangiwa tadol wong tan padoṣa| maweh larāmbĕk ing para| amangan paḍa ne wong haranya| ika ta janma mangkana kramanya| sakāla juga kinelikan| kinariṣyan| kinawĕdyan dening samanya mānuṣa| saparanya hasing sakahananya juga pinalĕhinangluh| pjah pwa wwang mangkana| kramanya tan doh dumunung mari naraka| hĕntasnya sangke ngkāna| wineh ta ya dadi triyak| de sang yamabala| nda nahan tmahanya| salwira ning triyak kinelikelikan| kinariṣyan| kinawĕdyan dening mānuṣa| yekā pinakajanmanya| nahan phala nika uttama ning gawenya hala| lĕwih wiparītanya| tan pasing kajanmanya sang hyang ātmā| pisaningu wruha ning kalinga ning dadinya| yapwan hana gamanya wnang tumakwanakna kalingan ing adhamanya ring sang paṇḍita|| apa kari nimitta ning pañcatriyak| satingkah ning mānuṣa magawe hala tiya| matangnyan pagawe ya para ring mānuṣa| pagawe ya hirikang triyak|| yan mangkana linga sang para| nda nihan pih parĕng mijil ikang bhuwana| ikang pañcatriyak| tan ucapĕn ikang swargga naraka| nguniweh ikang sarwwajanma halahayu| an pinakasaji ning bhuwana gatinya| ikang swargga phala ning magawe hayu| ikang naraka phala ning magawe hala| hĕntasnya sangkerika| irika ta yan pangjanma triyak| apan ulihnyāgawe hala| sangkṣepanya| saji ning bhuwana jugekang halahayu| umangkana mara kami ngke triloka| manghiḍĕp sukhaduhkha| larālapa| panastīs| tuhapati| saji ning janma mangkana| nohan wogan| ya ta matangnyan tan hana kasangśaya mami| apan saji ning bhuwana kami de bhaṭāra| māti mangjanma mwah| jātinya mangkana|| 22

ndah ya tiki dona sang hyang tattwajñāna| apan pinintonakĕn ri kita kamung para| ya ta matangnyan| ya ta māryya makajātinya mangkanekang rāt| yan wruha kita rumase| rumĕngö| rasa sang hyang tattwajñāna| yapwan enakatamwanira sang hyang tattwajñāna| de nikang rāt| yeka sangka ning tuturnya| gumawayakna rasa ning prayogasandhi| makasuluh tang samyagjñānan| makabhūmyabrata| tapa| yoga| samādhi| yeka tambā ning ātmasangsara|| 23

ikang ātmā| ndya manghiḍĕp sangsāra| kepwan ngwĕng rumase sang hyang tattwajñāna| arah| apan sinanggu sthiti sang hyang ātmā hana ring tūryyapada| tlas karuhun bhaṭara mahulun| sinangguh wyāpī sira hana ring niṣkala| kriyāśakti bhaṭara| umāweśa ikang ahangkāra| ikang ahangkāra umāweśa ikang wāyu| ikang wāyu ya ta sumusuki ng nāḍī| ikang nāḍī ya ta sūkṣma ring śarīra| ikang śarīra ya ta manghiḍĕpañcāgati sangsāra| niyatanya juge bhaṭara| ikang manghiḍĕp sangsāra| yan mangkana| milu dadi triyak|| sugyan mangkana linga sang para| ndan taham pih| nahan dṛṣṭopama kady angga ning apaṇḍe wusi| wusi ginawenya| ikang prabotaneka lwirnya| paran| palu| supit| kikir| asing wusi juga katunggalanya| mangkana tang wusi kati| ginawe khaḍga de sang paṇḍe| ikang khaḍga makweh lwirnya| ana khaḍga pinakagamangaman sang prabhu| ana khaḍga pinakagamangaman ing wong tani| ana khaḍga pinakagamangaman sang paṇḍita| ya yatah khaḍga juga kasangjñānya kabeh| yāwat wusi malaṇḍĕp| tāwat khaḍga juga kasangjñanya| tuhun gawenya juga dudū| ikang khaḍga haneng sang prabhu| kady angga ning curik| malalya śangkuh| pinakasādhana ning aprang mangalap huripaknanya| ikang khaḍga hana ring wong tani| kady angga ning luke| prĕkul| pinakasādhana ning amijilakĕn karmmopajīwa paknanya| ikang khaḍga hana ring sang paṇḍita| kady angga ning pakisi| kartrī| karayu| pinakasādhana ning amiso| pangri paknanya| ndan khaḍga juga tumampuh ring halahayu| kunang ikang prabwat pih| tan milu ika tumampuh ring halahayu| tuhun pinakapagawe juga hananya| tlas karuhun sang paṇḍe| wyapī wyāpaka juge sang paṇḍe| icchā ning manah sang paṇḍe juga| gumawe ikang wusi kati| sang paṇḍe juga wruhi tmahan ikang wusi kati| an makasādhana hiḍĕp nira| makapagawe ikang prabwat| ikang prabwat ta yan pagawe sang paṇḍe mohalaknekang prabot| yan humnĕng marāryyan sang paṇḍe umnĕng ikang prabwat| sthiti hana ri pakĕkĕsanya|| 24

alihakna pwa talinga pangrĕngö| mangkana ta bhaṭara mahulun| hana wyāpaka juga sira| cetananira juga| gumawaya kang sarwwajanma kangeh| an makasādhanekang kriyāśakti bhaṭara| makapagawe ikang ātmā hana ring tūryyapada| lawan ikang ātmā hana ring jāgrapada| an gumawayekang ātmā hana ring suptapada| winehnira manghiḍĕpa pañcagati sangsāra| sukhaduhkha| laralapa| panastīs| tuhapāti| sangkṣepanya| ātmekang ginawe sangsāra de bhaṭara|| nihan kramanya kengĕtakna| bhaṭara mahulun maharĕpanon| wastu sakala| ya ta matangnyan inicchā nirekang ātmā| tunggal| apan aparo lwirnya sang hyang ātmā| ri kālanira inicchā de bhaṭara| an kinon sira mañetaneng pradhāntattwa| ndan irika ta sang hyang maparo wkasan| hana wyāpāra| lawan tan wyāpāra| ātmā wyāpāra ngaranya| ri kālanira kinon mañetana ring pradhānatattwa de bhaṭara| mañetana ngaranya umyāparakĕn tutur sira| manghiḍĕp manganāngĕn yeka sinangguh mañetana ngaranya|| 25

ātmā tan wyāpāra ngaranya| bhaṭara mahulun marāryyan humnang| mari sira makon mañetana| humnang ikang ātmā mari mañetana| kadi lawan ikang dŗĕṣṭa ngūni| prabot sang paṇḍe| humnang ikang prabot| mangkana lakṣaṇa sang hyang ātmā| mari sira kinon mañetana de bhaṭara| humnang sang hyang ātmā mari mañetana| kaiwalya sthiti humiḍĕng tan polah| tan limbak| sira ta sinangguh ātmāwiśeṣa ngaranya| sira ta bhaṭara dharmma ngaranira waneh| kunang kālanira wyāpāra mañetana| irika ta sira pramāṇa ngaranira waneh| ikang ātmā sinangguh sang hyang pramāṇa| lawan sang hyang ātmāwiśeṣa| kewala sthiti hana ring tūryyapada| kunang ikang ātmā hana ring jāgrapada| ya yatah tunggalakṣaṇanira| kadi lakṣaṇa ning ātmā hana ring tūryyapada| kunang rwa bhedanya| agaṇal alit ika| ātmā hana ring jāgrapada| apan cetana swabhāwanya| cetana ngaranya| gaṇal ning ātmā hana ring tūryyapada| ikang ingaranan citta| ikang karaktan dening triguṇa| citta ngaranya| tutur wyāpāra tan wruhing halahayu| ika tang tutur lawan citta| tunggal swabhāwanya| citta ngaranya wyāpāra| tutur ngaranya ri kālanya sthiti humiḍĕng tan polah| ikang ātmā hana ring jāgrapada| tunggal tutur wyāpāra| lawan tan wyāpāra| bhedanya| ya yatah ātmā juga kasangjñānya| ikang ātmā pwa ginawe| wineh mangiḍĕp sangsāra sukhaduhkha| ikang ātmā inaranan ahangkāra| ya tika ginawe de bhaṭara| wineh matmahan sangśaya gaṇal| makaprabot ikang ātmā hana ring jāgrapada| lawan ikang ātmā hana ring tūryyapada| yeka pagawe de bhaṭara| nahan kramanya kengĕtakna| ikang ātmā inaranan ahangkāra sang waikrĕta| yeka ginawe de bhaṭara| lawan daśendriya| kunang ikang ātmā inaranan ahangkāra sang bhūtādi| yeka kinon de bhaṭara mangaweya pañcatanmātra| lawan pañcamahābhūta| kunang ikang manah| manah ngaran hiḍĕp| ikang hiḍĕp ya ta winimbana muwah| an matmahan ya tātmā lawĕlawö| ātmā lawĕlawö ngaranika ātmapariwāra| ātmapariwāra ngaranya| nihan lwirnya| ātmā| parātmā| nirātmā| antarātmā| sūkṣmātmā| yeka pañcātmā ngaranya| hiḍĕp katunggalanya| yeka sinangguh pamkas ing ātmā gaṇal| yeka tumampuh ring halahayu gatinya| tan pahusan tmĕn|| 26

śakaṭopamaṃ pradhānaṃ puruṣo wṛṣabhopamah|

īśasārathisaṃyuktaṃ jagat bhramitacakrawat|| 27

ikang pradhānatattwa yāngkĕn śakaṭa| ikang ātmā yāngkĕn wṛṣabha| iśah| bhaṭara īśwara sira kāngkĕn sārathya| humrĕgikang ātmā manghirid gritan| jagat bhramitacakrawat| ikang jagat kāngkĕn cakra ning gilingan gumulunga putĕran ring dewatā| mānuṣa| triyak| makanimitta dening karmma halahayu| mangkana wkasan ing ātmā gaṇal| yeka khaḍga kāngkĕn gawe sang paṇḍe| kunang ikang ātmā wyāpāra hana ring tūryyapada| yeka kāngkĕn supit sang paṇḍe| kunang ikang ātmā tan wyāpāra ya ta kna parĕṇa sang paṇḍe| ikang ātmā hana ring jāgrapada| lawan ikang ātmā hana ring tūryyapada| tan milu tumampuh ring halahayu| tlas karuhun bhaṭara mahulun| wyāpī wyāpaka juga sira| icchā ning manah rata juga| gumaway ikang sarwwajanma| ndya tikang ātmā sinangguh manghiḍĕp sangsāra| ya ta linga sang para| sinangguh ta yātmā manghiḍĕp sangsāra| ndan ikang ātmā inaranan ahangkāra sang waikṛta| yeka buddhi sattwa| yeka manghiḍĕp lara|| ikang ātmā inaranan ahangkāra sang taijasa| yeka buddhi rajah| yeka manglare| ikang ātmā kinaranan ahangkāra sang bhūtādi| yeka buddhi tamah| yeka pinakalara|| 28

nihan ta prabhedanyātmā manghiḍĕp| lawan ikang ātmā tan panghiḍĕp| apa pwa ya matangnyan bhaṭara dharmma| an sira pinakahurip ning sarwwajanma kabeh| tlas karuhun bhaṭara mahulun| an sira rakwa tumut mangjanma| pinakahurip ning hurip|| singgih bhaṭara hana pinakahurip ning wong kabeh| ndan ūtaprota lakṣaṇanira| ūta ngaranya| kady angga ning apuy hana ri ngĕsĕyĕn| pringampyal kayu| kunang tan kinawruhan| tan katon juga hananya| wyakta tan wyakta juga hananya| apa kalinganya| ya ta ngara ngĕsĕyĕng wangi rikang pringampyal kayu| niyatanyan tan pamijilaknapuy| kang yogya mijilaknapuy| apanegĕh kang kinahanan de ning apuy|| 29

alihakna talinga pangrangö| kadi mangkana ta bhaṭara| an hanerikang sarwwajanma| wyakta tan wyakta| juga hana nira hana ring rāt kabeh| nahan panghinggan ri wyakta sira lawan tan wyakta sira| hana ri wwang kabeh| haywinucap ikang janma kabeh| samanya| ikang tan ana tuturnya| mwang tan ana kaprajñāniriya| ika sang kinahanan dening tutur lawan kaprajñān| sira caritākĕn rumuhun| sang sāmpun wruh ri kalinga ning prayogasandhi| nguniweh sira sang lumkasakĕn tapa| brata| yoga| samādhi| apa kapo matangnyan mewĕh ika sang wnang manuwuhakĕn jñāna| lawan wnang tumamwa yogawiśeṣa| kenakanya| sabarinya| wruha ring yoga| samādhi| lumkasakĕn tapa| brata| yoga| samādhi| wnang sira sakāmakāma| wnanga ta sira juga lumkasakĕn prayojana sira| sakweh nikang lumkasaknikang prayogasandhi| tan kewĕhana juga sira| apan paḍa kinahanan ngaranya| sira dening ātmāwiśeṣa| mewĕh ikang sang nginandĕlan dening bhaṭara|| prota kapwa panghinggananta| kady anggan ing teja ning maṇik| mangekadeśa hananya| ndah mangkana bhaṭara| ikonggwan sira mangekadeśa| ādhyātmika juga sang hinandĕlan teking bhaṭara| ndātan padonikang brata| tapa| yoga| samādhi| gawayakna| apan tanana ngaranika| ikang inaṛpaṛp yan mangkana| apan mewĕh sira sang kinahanan dening ātmāwiśeṣa| mewĕh sira sang hinandĕlan dening bhaṭara| ling ning āgama|| sugyan mangkana ling sang para| taham pih| gawayakna hikang brata| tapa| yoga| samādhi| apa nikang samādhi| īśwarapraṇidhāna| yeka kārddhanan sang hyang ātmāwiśeṣa| nguniweh kārddhanan bhaṭara| yapwan sing lot humabhyasa| ikang samādhi| īśwarapraṇidhāna| tan pangucapālawas| masĕngkĕra hurip sira humabhyāsa ikang samādhi| ri janmanira sohah [sowah]| matutur juga sira humabhyāsa ikang samādhi| ndah mangkana ta tuturan pih bhaṭara| hinandĕlan sira dening bhaṭara| sangkṣepanya| inarddhana sinamādhi tka bhaṭara| an hana sira irikang wong| ya tan hinarddhana| tan sinamādhi| sira tan hana irikang wong| nihan tang pañcatriyak| an sinangguh mari pāwak bhaṭāra dharmma| apa pwa matangnyan wiparīta tanana tuturnya| kenakanya| matutura ta ya ring prayojana kabeh| yan tuhu ya kinahanan dening bhaṭara dharmma| apa pwa gawenya tan mangkana| yeka panghinganan panganumānan| an lalis bhaṭāreriya| kewala tan kinahanan juga| gatinya dening ātmāwiśeṣa| ikang ātmā ndya pwa hana ngkāna| ikang ātmā lawĕlawö juga| ika pamkas ning ātmā gaṇal| ikang hinaranan hiḍĕp| ya ta matangnyan ikang wāyu| śabda| hiḍĕp juga hana ngkāna| wāyu pinakahuripnya| ikang hiḍĕp inanāngĕnangĕnya| ikang śabda pinakaswaranya| ya ta matangnyan tan pawastu śabda ning triyak| apan tan kinahanan dening ātmāwiśeṣa| kunang ikang wāyu| śabda| hiḍĕp juga larih wratta| ika ring triyak magöng admit| tka ring sthāwara| janggama| tṛṇa| taru| latā| gulma| tanana katunan wāyu| śabda| hiḍĕp| ikang sattwa tumuwuh| kunang ikang sang hyang ātmāwiśeṣa| kewala juga sira tan hana ngkāna| ndan lupa lakṣaṇānya ring janma samangkana|| 30

ikang wāyu| śabda| hiḍĕp juga larih wartta| hana ring janmamānuṣa| mwang kaniṣṭha| madhyamottama| tanana katunan wāyu| śabda| hiḍĕp| kunang sang hyang ātmāwiśeṣa| ādhyātmika juga sira| sang kinahanan ātmāwiśeṣa| tlas karuhun bhaṭara mahulun| mangarccaneriya| ikang janmamānuṣa kabeh| tan paḍa lawan rowangnya| hana tutur| hana lupa| hana prajñān| hana pungguh| apa ta linganya| sang kinahanan dening ātmāwiśeṣa| prajñān atutur| apa nikang atutur ngaranya| yeka pangawak sang hyang wiśeṣa| mangke ring mānuṣa ika ta sang prajñān| lawan sang matutur kaniṣṭha| madhyamottama| ika lwirnya| apa dumeh yan mangkana| apa kaniṣṭha| madhyamottama| lakṣaṇa sang hyang ātmā| sang kumalalan ring mānuṣajanma| ya ta matangnyan kaniṣṭha| madhyamottama| lwir nikang sang matutur lawan prajñān| kunang sang apunggung lawan sang malupa| akḍik tuturnya| kaniṣṭha ning kaniṣṭha| ikang ātmā ngaranika yan mangkana| nahan yukti nikang janma kaniṣṭha| madhyamottama| denyāmanggihakĕn kaprajñān lawan tutur| apa nikang ātmā kaniṣṭha| madhyamottama| lakṣaṇanya hana ring jāgrapada| lawan hana ring tūryyapada| yan ātmā uttama| hana rikang wwang| uttama nikang wwang| umangguhakĕn kaprajñān lawan tutur| yan madhyekang ātmā| hana rikang wwang| madhya denyāmanggihakĕn kaprajñānanya| lawan tutur| kunang yan kaniṣṭha ning ātmā| hana rikang wwang| kaniṣṭha denyāmānggihakĕn kaprajñān lawan tutur| kunang yan kaniṣṭha ning kaniṣṭha ikang ātmā| hana rikang wwang| tan hanekang kaprajñān lawan tutur| yan mangkana| tuhun tuturmātra juga| hana rikang wwang| yan mangkana| kunang sang kinahanan dening ātmāwiśeṣa| uttama| sira ta mewĕh ātmā uttama| ātmāwiśeṣa ngaranira|| ndan taham pih| ade ikang paḍa tang waang kinahanan dening ātmāwiśeṣa| tanana katunan wiśeṣa ika ngaranya| ikang rāt kabeh| kunang sor lĕwih lawan rowangnya waneh| ikang śubhāśubhakarmma dumadyakĕn ika| yeka nimitta ning janma kaniṣṭha| madhya| uttama| lwirnya|| 31

mangkana linganta sang para| singgih śabda sang para| ikang sukhaduhkha ngaranika| ndan ikang śubhāśubha ngaranira| ikang prajñān lawan punggung| ikang tutur lawan lupa| yeki carita gumulun| apa pwa nimittanya| hana prajñān kinahanan dening tutur| ndan kāsyasih juga ya| tan kinahanan dening wibhawa| nguniweh yan wikārākāra kunang| ikang janma mangkana| ndan tutur lawan kaprajñān| tan sah juga sakeriya| yeka pinakadṛbyanya| pinakamāsmanikṇya| hana ta ya janma salisuh amanggiha wibhawa t(ĕ)hĕr| tan hana tuturnya| tan kinahanan dening kaprajñān| apan dumadyakĕn ika| ade ika sĕngguhan śubhakarmma dumadyakĕnika| sangkṣepanya| larangan juga sang kinahanan dening ātmāwiśeṣa| sang prajñān| sang matutur| sang kinahanan dening ātmāwiśeṣa| nihan panglangganerikang rāt kabeh| tanana wehana punggunga lawan ikang lupa| kewala tutur| kaprajñān lwirnya kabeh| ikang janma kaniṣṭha| madhya| uttama| tan hana lupa lawan punggung| matutura prajñān juga kenakanya kabeh| apan paḍa hinakdĕlan| paḍa kinahanan dening ātmāwiśeṣa| linganta kamung para| apa pwa gawenya tan mangkana| nahan panghinggana manganumānan| an mewĕh ika sang kinahanan dening ātmāwiśeṣa| sang hyang ātmāwiśeṣa ngaranira| prajñān makāwak tutur prakāśa juga| nahan panganumānan| ikang janma lupa lawan punggung| tan kinahanan dening tutur lawan prajñān| tan kinahanan juga gatinya dening ātmāwiśeṣa|| ikang ātmā ndya pwa hana ngkāna yan mangkana| ikang ātmā wyāpāra| kang hana ring jāgrapada juga| ikang iranan dita| sinangguh mangaku| mamastwani tan kawastwan| manon tan katon| yeka hana ngkana| ya ta matangnyan wruh mamastwani ring hana lawan tan hana| nahan kalĕwihnya sangkeng triyak| tuhun tan wruh ta ya ring wiśeṣa| tan wruh ta ya ring śāstrāgama| ya ta sinangguh janma iwĕngiwö ngaranya| katmu juga sang tutur denya| kahaḍangaḍang [kahaḍanganan Ed] juga kang hayu denya| apan tan pasuluh śāstrāgama|| kunang yan hana janma katon prajñān| widagdha wruh mangaji| ndan kaniṣṭha denyāmanggihakĕn kaprajñān lawan tutur| ya taya ta [ya yatah Ed] juga tan kinahanan dening ātmāwiśeṣa| atmĕha ndya pwa hana ngkāna| ikang ātmā wyāpāra hana ring tūryyapada| sira hana ngkāna|| 32

kunang yan hana janma katon prajñān| widagdha wruh mangaji tan hana kolih nira ring guṇa kabeh| samyagjñāna kunang sira| uttama dening ātmāwiśeṣa kaprajñān| ndan irika ta yan ātmāwiśeṣa| hana ngkāna ya mangkana| ātmāwiśeṣa ngaranira| bhaṭara dharmma| bhaṭara dharmma ngaranira ikang ātmā tan wyāpāra hana ring tūryyapada| ikang sinangguh prajñān| pinakatutur prakāśa| sira ta hana ngkāna yan mangkana|| kunang yan hana janma katon limpad| denya umangguhakĕn sakeng uttama nira| ikang ptajñān lawan tutur| limpad sakeng uttama ngaranira| wnang sira wyāping wyāpaka ring sakala| wnang ta mamintonakĕn panganumānan| makadṛbya kāṣṭaiśwaryyan| mwang manĕmwanĕn yogawiśeṣa| uttama de nira umangguhakĕn kayogīśwaran| ndātan wnang rinatwan| bhaṭarādipramāṇa hane ngkāna mangkana| bhaṭarādipramāṇa ngaranira bhaṭara sadāśiwatattwa| nguniweh bhaṭara dharmma| sira ika hana ngkāna yan mangkana|| 33

nahan prabheda ning ātmā| an kaniṣṭha| madhya| uttama| sang kumahanekang janma tutur lawan prajñān|| ika puhun ngwang rumaseng ikang tattwa harah| ikang sinangguh ātmā lawĕlawö| juga dumampuhing halahayu| ling ning ātmā| kunang ikang ātmā hana ring jāgrapada| lawan ikang ātmā hana ring tūryyapada| yeka tan milu tumampuh ring halahayu| ling ning tattwa tambeyan| mangke pwa ya sira pinakātmā| sama kaniṣṭha| madhya uttama| de nira umangguhakĕn tutur lawan kaprajñān| nguniweh ikang punggung lawan lupa| tlas karuhun de nira umangguhakĕn limpad| sakeng uttama| ikang tutur lawan prajñān| niyata maśarīra juga bhaṭara yan mangkana| nguniweh ikang ātmā hana ring jāgrapada| lawan ikang ātmāhana ring tūryyapada| niyatanyan maśarīra juga yan mangkana| yāwat maśarīra| tāwat milu ika tumampuh ri halahayu yan mangkana|| sugyan mangkana ling sang para| ndan taham pih| nihan dṛṣṭopama| kady angga ning maṇik sphaṭika| sāmpun kinaniścaya nikang maṇik sphaṭika| an kewala śuddha putih nirmmala| nirāwaraṇa tan patalutuh| juga warṇṇa nikang maṇik| tathāpinyan mangkana| raktakna ta ya irikang warṇṇa| yan abang| yan akuning| ika ta yan masalin warṇṇa ikang maṇik| an makawarṇṇa unggwanikang rumakĕt uga kawkasan| yeka sinangguh karaktan lawan kopaṛnggan ngaranya| kadi hilang warṇṇa nikang maṇik kahiḍĕpnya| tlar juga warṇṇa nikang maṇikang tan patalutuh| makanimitta pasahakna ikang maṇik lawan ikang warṇṇa| ndan irika ta yan katon śuddha putih nirmmala| ikang maṇik wkasan| muwah ri jātinya ngūni| ikang warṇṇa raktanya ngūni| hanekāwakanya jugeka wkasan|| 34

alihakna talinga pangrĕngö| iwa mangkana ta sang hyang ātmā hana ring jāgrapada| lawan sang hyang ātmā hana ring tūryyapada| an pinakātmā ning rāt kabeh| ndan alit acintya sūkṣma juga sira| nirmmala| śuddha putih| nirāwaraṇa| tan patalutuh| makāwak sphaṭikajñāna juga sira| ya ta matangnyan tan kna sira ring halahayu| katunu sira tan gsĕng| kaḷbu ring bañu sira tan tĕlĕs| apan alit sūkṣma juga sira| acintyāngandĕlitan kandĕlan juga sira ring jñāna| manon tan katon| mangaku tan kāku| mamastwani tan kawastwan juga sira ring wāyu| śabda| hiḍĕp| tuhun sira kopaṛnga juga sira de nikang inungwanira| sarūpa nikang inungwanira pinakarūpa nira| ya ta matangnyan kadi milu kahiḍĕpanira| tumampuh ring halahayu| kintu taha| ikang ātmā hana ring sūptapada| lawan ikang ātmā hana ring swapnapada| juga manghiḍep sangsāra| aputĕran ring dewatā| mānuṣa| triyak| tumampuh ring halahayu| suptapada ngaranya ikang lupa| yeka nimitta ning ātmā maturu| swapnapada ngaranya para ning ātmā mangipi| ikang ātmā hana ring suptapada lawan ikang ātmā hana ring swapnapada| yeka sinangguh ātmasangsāra ngaranya| kintu tunggal sang hyang ātmā| ika juga paḍa maprabheda sangśaya gaṇal| ātmā mahḷt ikang sarwwatattwa| an matumpangtumpangan| kadi tala ning tawwan lakṣaṇa sang hyang ātmā| hana ring sapadapada| ātmā ya ta inaranan hanak ning tawon| umungguh irikang pada| nihan lakṣaṇa sang hyang ātmā kengĕtakna| yan umungguh sira ring swapnapada lngĕlngö hiwĕngiwöng juga lakṣaṇanya| hanan tuturarddha wurāwutan waspada| kadi lakṣaṇa ning mangilo ring wwai juga tumon ing wastu hana lawan tan hana|| mungguh kapo sira ring suptapada| alupa wiparīta tan kahanan tutur| kadi hilang juga sang hyang ātmā lungha tka| apan sinaputih kālanidrā|| mungguh kapo sira ring jāgrapada| awas pratyakṣa sang hyang ātmā tumon ikang wastu hana lawan tan hana| apan prakāśa nirmmalekang pada| teja nira warṇṇākāśa| ahning anilānila| mangkana lakṣaṇa sang hyang ātmā hana ring jāgrapada|| suptapada| swapnapada kakasut kahmu juga dening pradhānatattwa| sahingan ing pradhānāmangku| kahasan kalanglangan kaparacakra juga dening manah mangalpana| kalangkahan ya dening rahina wngi| kunang prabhedanya| ikang satahun ring mānuṣa| yeka pinakawngi ring jāgrapada| ikang rowlas tahun ring mānuṣa| yeka pinakalek ring jāgrapada| ikang sayuga ring mānuṣa| yeka pinakatahun ring jāgrapada| ikang caturyyuga ring mānuṣa| yeka satapa ring jāgrapada| nahan lakṣaṇa sang hyang ātmā hana ring jāgrapada|| umungguh kapo sira ring tūryyapada| enak tmĕn waspada sang hyang ātmā tumon ring sarwwawastu| hana lawan tan hana| enak enak de nira kumawruh irikang atītānāgatawarttamāna apan prajñān makāwak tutur prakāśa sira| teja sira śuddha putih| kadi warṇṇa ning maṇik sphaṭika| alilang ahning tan patalutuh| tmĕnityakāla juga| rahina sadā tan kahḷtan tiking rahina wngi| nguniweh tan katkan dening manah mangalpana| kunang ikang jāgrapadam pih| kedĕran kaparacakra dening manah mangalpana| nahan kasor nikang jāgrapada dening tūryyapada| apan alit iking tūryyapada| kewala juga tatan katnan dening hiḍĕp| tlas karuhun ikang tūryyapada| apan unggwan bhaṭara mahulun ikang tūryyāntapada| teja nira prakāśa dumilah| kadi teja ning āditya sewu| tuhun tan apanas bhedanya| niwala prakāśa paḍang juga| rahina sadā nityakāla/ tan kahḷtan dening rahina wngi| kinahanan sira dening arwwajñā sarwwakāryyakarttā| jñānaśakti| wibhuśakti| prabhuśakti| kriyāśakti| nahan kasor nikang tūryyapada| dening tūryyāntapada| kintu paḍālitnya| mwang sūkṣmanya| ya ta matangnyan kewala juga tan katkan dening hiḍĕp| sangkṣepanya| sang manĕmwakĕn yogawiśeṣa juga tka ngkāna|| 35

apa pwa matangnyan tan wanang inucapakĕn ri hana ning tūryyapada mwang tūryyāntapada| apan tan katkan dening hiḍĕp| apan ikang hiḍĕp ngaranya| yeka pinakasādhana ning mangawruhi| wastu hana lawan tan hana| sugyan mangkana linga sang para|| ya ta don ikang pramāṇa tlu| pinakasuluh mata kita kasamyagjñāna| pramāṇa tlu ngaranya| pratyakṣapramāṇa| anumānapramāṇa| āgamapramāṇa| ika tang wastu gaṇal| sakaton sakaṛngö| sakagamĕl dening tangan| yeka kawnang dening pratyakṣapramāṇa|| kunang ikang sūkṣma kadi lakṣaṇa ning tūryyapada| yeka kawnang dening anumānapramāṇa|| kunang ikang paramasūkṣma kadi lakṣaṇa nikang tūryyantapada| yeka kawnang dening āgamapramāṇa|| nahan lakṣaṇa nikang pada| magaṇal alit| ya ta tinūt ikang ātmā| magaṇal alit swabhāwa ning ātmā|| ikang ātmā hana ring jāgrapada| yeka kuminnin kempĕning ātmā hana ring suptapada| lawan ikang ātmā hana ring swapnapada| yapwan enak papisa nika mara ring jāgrapada| mulih ta sira maring tūryyapada| enak pwāndĕl nira ring tūryyapada| mulih ta sira maring tūryyapada| nahan lakṣaṇa sang hyang ātmā hana ring sūkṣma ika kabeh|| 36

utpatyakna pwa sira| ring janma samangkana| sang hyang ātmā ring pṛthiwī| umandĕli ring bhuwanaśarīra| wyāpaka pwa sira ring ṣaḍrasa| sāri ning pañcamahābhūta| pṛthiwī| āpah| teja| wāyu| ākāśa| yeka mamijilakĕn ṣaḍrasa| nahan lwirnya| amla| kaṣāya| tikta| kaṭuka| lawaṇa| madhura|| amla nga asĕm| kaṣāya nga sĕpĕt| tikta nga pahit| kaṭuka nga apḍĕs| lawaṇa nga asin| madhura nga manis|| nahan sinangguh ṣaḍrasa ngaranya| yeka ngaraning pūrwwa ning amuwuh śarīra| kapingrwa ning amuwuh śarīra| ikang ṣaḍrasa pinanganinginum dening lakilaki| hanakbi| sāri nikang pinanganinginum| yeka matmahan rah daging gajih| kapingtiga ning amuwuh śarīra| sāri nikang rah daging gajih| ya tika matmahan kāmaratih| yeka pinakapanggihakĕn dening rāga| yeka mangdadi muwah| yekākweh ikang kāma sakeng ratih| yeka dadi lanang| yan akweh ikang ratih sakeng kāma| yeka dadi wadon| yapwan samākweh ikang kāma lawan ratih| yeka dadi kḍi| walawadi kunang| kunang ikang kāma| yeka dadi tahulan| hotot| puhun wulu| ikang ratih| yeka matmahan rah daging gajih| nahan wyakti nikang pañcamahābhūta| mūla ning śarīra samangke| wyaktinya| pṛthiwī pinakakulit| āpah pinakarah| teja pinakadaging| wāyu pinakatahulan| ākāśa pinakasumsum|| ikang pañcatanmātra| tmahanya| śabdatanmātra dadi talinga| sparṣṣatanmātra mangdadi kulit| rūpatanmātra mangdadi mata| rasatanmātra mangdadi liḍah| gandhatanmātra mangdadi irung| yeka sinangguh pañcagolaka ngaranya| tumambĕh tang aṇḍabhuwana| saptapātāla| saptabhuwana|| saptabhuwana ngaranya| bhūrlloka wtang bhuwarlloka hati| swarlloka ḍaḍa| tapoloka gulu| janarlloka ilat| maharlloka irung| satyaloka mata| nahan sinangguh saptabhuwana ngaranya|| saptapātāla ngaranya| pātāla silit| waitala pupu| nitala tur| mahātala wtis| sutala paglangglangan ing [Ed paglangaking] suku| talātala wahakanging talampakan| rasātala ḷpaḷpanya i sor| nahan tang sinangguh saptapātāla ngaranya|| 37

nahan tang sinangguh aṇḍabhuwana ngaranya ring śarīra| ikang janma samangke| mandĕl tang saptaparwwata| gumulak lumimbak sang saptārṇṇawa| ḷmĕng sumnĕng tang saptadwīpa| umiri tang daśawāyu ring nāḍī|| saptaparwwata ngaranya| wungsilan gunung mālyawān| palitalitan gunung niṣedha limpa gunung gandhamādana| paruparu gunung malayamahīdhara| ampru gunung triśṛngga| hati gunung windhya| pusuhpusuh gunung mahāmeru| nahan sinangguh saptaparwwata ngaranya| saptārṇṇawa ngaranya| mūtra tasik tok| rah tasik kilang| aringĕt tasik asin| gajih tasik miñĕk| idu tasik madhu| sumsum tasik susu| utĕk hasik wahan| nahan sinangguh saptārṇṇawa ngaranya|| saptadwīpa ngaranya| tahulan jambudwīpa| hotot kuśadwīpa| daging śangkhadwīpa| kulit śālmalidwīpa| gulu gomedhadwīpa| kukus puṣkaradwīpa| untu| krauñcadwīpa|| nāḍī ngaranya| lyang ning hotot| bungkahnya| i sorr ing nābhi| miṇḍuhur ta ya tkeng pusar| hana ta pangumalang kwehnya sewu witung wuluh ro| ana ta ya nāḍī wiśeṣa kwehnya sapuluh| lwirnya| iḍā| pinggalā| suṣumnā| gāndhārī| hasti| jihwā| pūṣā| alambuṣā| kuhūh| śangkhinī|| iḍā ngaranya ikang nāḍī tngĕn| awan ing skul wruh sma lunglangan tkeng ḷt| pinggalā ngaranya ikang nāḍī kiwa| awan ing wway wruh sma lunglangan tkeng huyuhuyuhan| suṣumnā ngaranya ikang tngah| hawan ing wāyu amatlu| gāndhārī ngaranya pasimpangan ing nāḍī| hawan ing wāyumaring tutuk| maring mata| maring irung| maring talinga| mari wunwunan| hasti ngaranya pasimpangan ing nāḍī| hawan ing wāyu tkeng sarwwasandhi| wruh sma lunglangan tkeng kulit| puhun wulu| jihwā ngaranya pasimpangan ing nāḍī| hawan ing wāyu tkeng pusuhpusuh| pūṣā ngaranya pasimpangan ing nāḍī| hawan ing wāyu tkeng paruparu| alambuṣā ngaranya pasimpangan ing nāḍī| hawan ing wāyu tkeng hati| lawan ampruh| kuhūh ngaranya pasimpangan ing nāḍī| hawan ing wāyu tkeng limpa| śangkhinī ngaranya pasimpangan ing nāḍī| hawan ing wāyu tkeng wungsilan mwang tkeng palitalitan| nahan tang sinangguh daśanāḍī ngaranya|| 38

kunangaraning wāyu wuwusĕn| lwirnya| prāṇa apāna samāna udāna wyāna|| wāyu si prāṇa haneng pusuhpusuh i ḍaḍa hinganya| umadi manglakwan wāyu kabeh| pinakajīwa| pinakośwāsa paknanya|| apāna ngaranya| ikang wāyu haneng huyuhuyuhan| umawasāri ning pinanganinginum| matmahan kāma ratih| ampasnya dadi tahi huyuh| sāri ning inambung| matmahan ṛhakumbĕl|| udāna ngaranya| ikang wāyu haneng wunwunan| angulahakĕn mata| lawan tutuk paknanya|| wyāna ngaranya| ikang wāyu haneng sarwwasandhi| angulahakĕn śarīra mwang humawas tuha pati paknanya|| samāna ngaranya| ikang wāyu haneng hati| uumawasāri ning pinanganinginum| matmahan rāh daging hampru| yeka sinangguh pañcawāyu ngaranya|| sapuluhnya nihan| lwirnya| nāga| kūrmma| kṛkara| dewadatta| dhanañjaya| wāyu si nāga| magawe matöb [Ed watĕb]| ikang wāyu si kūrmma| magawe ktĕr| klut ing śarīra| ikang wāyu si dewadatta| magawe ngob paknanya| ikang wāyu si kṛkara| magawe wahin paknanya| ikang wāyu si dhanañjaya pinakaśabda paknanya|| nihan sinangguh daśawāyu| kintu sawlas kweh nikang wāyu| gawenya juga sapuluh| yeka nimittanya sinangguh daśawāyu|| 39

tlas mangkana| humandĕl tang ātmā lawĕlawö| lwirnya| ātmā| parātmā| antarātmā| sūkṣmātmā| nirātmā|| ātmā ikang hiḍĕp munggw ing hati| pinakapangangĕnangĕn paknanya|| parātmā ikang hiḍĕp munggw ing mata| pinakapanon paknanya|| antarātmā ikang hiḍĕp munggw ing wunwunan| pinakapāntara ning tanghi lawan turu paknanya|| sūkṣmātmā ikang hiḍĕp munggw ing talinga| pinakapangrĕngö paknanya|| nirātmā ikang hiḍĕp munggw ing kulit| pinakapangiḍĕp paknanya|| nahan yang sinangguh pañcātmā ngaranya| iḍĕp katunggalanya| tumambĕh tang daśendriya| lwirnya| śrotrendriya haneng karṇṇa| ya kāraṇa ning ātmā pangrĕngö śabda halahayu|| twagindriya haneng kulit| ya kāraṇa ning ātmā manghiḍĕp panastīs| mangrasa ni sinaṇḍang hana saḷmbut|| cakṣurindriya haneng mata| ya kāraṇa ning ātmā manon rūpawarṇṇa|| jihwendriya haneng liḍah| ya nimitta ning ātmā mangrasa ṣaḍrasa|| ghrāṇendriya haneng irung| ya kāraṇa ning ātmā mangmbung gandha| abo lawan awangi|| wāgindriya haneng tutuk| ya kāraṇa ning ātmā panabda| amastwani hana lawan tan hana|| pāṇindriya haneng tangan| ya kāraṇa ning ātmā manggamal|| pādendriya haneng suku| ya kāraṇa ning ātmā lumaku|| pāywīndriya haneng ḷt| ya kāraṇa ning ātmā mangintut| mangising|| upasthendriya haneng naga purus| ya kāraṇa ning ātmā maśuklaśwanita|| nahan rakĕt nikang daśendriya ring bhuwanaśarīra| tumambĕh tang buddhi manah ahangkāra| ikang buddhi| ya pinakasādhana ning ātmā pangĕnangĕn|| ikang manah yeka pinakasādhana ning ātmā pamikalpa| mangrūpaka|| ikang ahangkāra| ya pinakasādhana ning ātmā pangaku dṛbya| mwang pinakasādhana ning ātmā paḷkasakĕn kriyā halahayu|| ikang buddhi manah ahangkāra lawan daśendriya| ya sinangguh trayodaśakaraṇa ngaranya| tumambĕh tang triguṇa| sattwa rajah| tamah|| 40

sang hyang tripuruṣa| pūrwwa ning umandĕl| brahmā ring hati| wiṣṇu ring ampru| īśwara ring pusuhpusuh|| andĕl ning pañcaṛṣi nihan| sang kuśika ring kulit puhun wulu| sang gargga hana ring rah daging| sang maitrī ring wuduk| ring hotot| sang kuruṣya ring tahulan| ring sumsum| sang pṛtañjala [Ed. em. wṛttañjaya, sic] ring tumpuk ning śarīra|| andĕl ning dewaṛṣi nihan| sang hyang maheśwara ring wungsilan| sang hyang rudra ring dalĕman| sang hyang śangkara ring limpa| sang hyang śambhu ring huṇḍuhuṇḍuhan| sang hyang sadāśiwa ring huyuhuyuhan| sang hyang paramaśiwa ring ḍaḍa|| andĕl ning saptaṛṣi nihan| āditya ring mata tngĕn| soma ring mata kiwa| anggāra ring talinga tngĕn| budha ring talinga kiwa| wṛhaspati ring irung tngĕn| śukra ring irung kiwa| śaniścara ring tutuk|| andĕl ning dewatā nihan| hyang indra ring ḍaḍa| hyang yama ring tangan tngĕn| hyang waruṇa ring walakang| hyang kubera ring tangan kiwa| hyang waiśrawaṇa ring madhya|| andĕl ning widyādhara| gandharwwa nihan| citrasena pinakakawanin| citrānggada pinakakaśūran| citraraṣa pinakakadhīran| gandharwwa pinakaśānta| pinakatṛpti| pinakaramya| pinakaharśśa pinakawijah| pinakakalangön| nahan andĕl ning sattwa|| O||

andĕl ning rajah nihan| dānawa pinakakrora| pinakāglis| pinakapanasdāran|| daitya pinakakrodha| pinakaglĕng| pinakasungsut|| rākṣasa pinakamoha| pinakadambha| pinakīrṣyā| pinakacapala| pinakasāhasa|| nahan andĕl ning rajah|| O||

=andĕl ning tamah nihan| bhūtayakṣa pinakalapa| pinakānglih| pinakawaṛg| pinakamtah| pinakawĕṛ|| bhūtapiśāca pinakaluhya| pinakalmĕh| pinakakaluśa| pinakārip| pinakaturu| pinakapunggung| nahan andĕl ning tamah|| handĕl pada nihan| ikang jāgrapada| yeka nimitta ning ātmā matangi matutura mangke ring mānuṣa|| ikang suptapada| yeka nimitta ning ātmā maturu|| ikang swapnapada| yeka nimitta ning ātmā mangipi| mangampĕlu mangke ring mānuṣa|| nahan andĕl ning pada|| 41

kunang pradhānatattwa| yeka pinakāwak sang hyang ātmā| ambĕk ngaranya| mangke ring mānuṣa| ikang ambĕk| yeka pinakāwak sang hyang ātmā| mangke ring mānuṣa| pinakātmā hana ring śarīra samangke| angga pwa ngaraning śarīra| ambĕk pwa ngaraning pradhānatattwa| ikang ambĕk lawan śarīra| yeka sinangguh anggapradhāna ngaranya mangke ring mānuṣa| ya kāraṇa ning ambĕk pasaṃmoha ning halahayu| mtu akeng ambĕk juga halahayu| sukhaduhkha bhinukti dening mānuṣa| mijil sangkeng ambĕk juga yan pamiṣaya| makasādhana daśendriya| makadwāra ikang daśamārgga| mahasta ya ring aṇḍabhuwana mamiṣaya| mengĕt pwa ya sang nipuṇatattwa [triguṇatattwa?]| mangkana kramanya| ya ta matangnyan ikang daśendriya watĕkĕn sawiṣayanya| ulihakna maring ambĕk| ikang ambĕk waluyakna pramāṇa| sang hyang pramāṇa| muwahadharmmawiśeṣa| dharmmawiśeṣa| muwaha antawiśeṣa| antawiśeṣa| waluyakna anantawiśeṣa| umapa dening umaluyakna sira ring anantawiśeṣa| ya donikang prayogasandhi| ni kawruhan de sang yogīśwara| ika tang prayogasandhi| tan wnang ya tan pakasuluh samyagjñāna| para ta dening kumawruhakna prayogasandhi| ya tan pakanimitta samyagñāna| tan wnang ika ya tan pakabhūmi brata| tapa| yoga| samādhi| sangkṣepanya| makabhūmi brata| tapa| yoga| samādhi| makasuluh samyagjñāna| makasādhana prayogasandhi| sira juga sang wnang tumkani kawiśeṣan bhaṭara| kady anggan ing hru pinanahakĕn| sāmpun ing laras| abnĕra juga tampuhnya| hana pwa wong amanahkĕn hru tanhing bhaṭara| tan abnĕra lakunya| ana saranguntit laku nikang hru yan mangkana| luputinujunya| kalinganya| hana sira sang amanggihakĕn ikang brata| tapa| yoga samādhi| lumkasakĕn ikang prayogasandhi| an mangkana luputing kasamyagjñāna| ri sḍĕngnya tīkṣna de nira gumawayakĕn ikang samādhi| tībra mwang sādhananya| an mangkana sira kepwan tan wruh ri tampuha ning jñāna nira| apan sira tan wruhing hattyajñāna| tan pasuluh samyagjñāna| niyata saranguntit| salah wara juga samādhi sang yogīśwara yan mangkana| phala ning brata juga manuntunakĕn| aminta bhinukti| amnĕr mara ring swargga juga sang hyang ātmā yan mangkana| phala ning samādhi| yeka rumakṣa phala ning brata| tlas pwa phala ning brata bhinukti dening ātmā ring swargga| tumurun ta sang hyang ātmā muwah| mangjanma ta sira ring mānuṣaloka| yeka dadi ratu| mwang sugih| kṛtapuṇya janma sira| swabhāwa ning mānuṣa pwa ya| kinahanan dening tutur mwang lupa| ri kālanya tka tutur| kadadi pwekang śīla rahayu dening janma| ri kālanya tka lupa| kadadi tekang śīla mahala dening janma| irika ta yan maputĕran| ring swargga naraka| mānuṣa triyak wkasan|| mangkana wāsanā ning wwang lumisin| tapwan ya tan samyagjñāna|| 42

kunang sira sang wyāpārajñāna nira rumuhun| ndan makaputusaning masimpĕn wāsanānya| yeka sang amrih mangusira kasamyagjñāna juga| ya yatah sira makabhūmi brata| tapa| yoga| samādhi| an tan wnang samyagjñāna| yan tan makanimitta samādhi| apa kalinganya| nihan kramanya| ikang sattwa| rajah| tamah| tan angga patūta| tāgawe hayu| tāngĕnakĕn dharmma puṇya| mangkana ling nikang sattwa|| krodhāglĕng aku ling nikang rajah|| almĕh| luhya| tamanganinginum| aturu juga| ling nikang tamah|| mangkana kirakira ning sattwa| rajah| tamah| mapalangan tan patūt| ikang rajah tamah| apunggung swabhāwanya| ikang sattwa prakāśa| prajñān widagdha| pinakaswabhāwanya| mengĕt pwa sang triguṇatattwa [Ed. niguṇatattwa] mangkana kramanya| matangnyan ikang rajah tamah| tinĕḍuhakĕnira ring samādhi| makasādhana prāṇāyāma| makasahāya citta buddhi manah| śāntālilang ahning| nirāwaraṇa| tan patalutuh| ikang jñāna langgö nirmmala| enak pwātmā nikang rajah| tamah| mapagĕh manūt maring sattwa| prakāśa irikang sattwa| nahan yukti nikang prajñān mtu saking samādhi| yāwat kapanggih ikang prajñān| ariwāriwa ikang samyagjñānan| katmu dening kayogīśwaran| ikang samyagjñānan| kumawruhi prayogasandhi| makabhūmi brata| tapa| yoga| samādhi| sirāmnĕrakĕn dumunung dening āmanggihakĕn yogawiśeṣa| an makasuluh samyagjñāna| makasādhana prayogasandhi| makabhūmi brata| tapa| yoga| samādhi| ikang prayogasandhi| kāngkĕn hru malaṇḍĕp malungid| ikang samyagjñāna| kāngkĕn hĕlarnya| ikang brata| tapa| yoga| samādhi| kāngkĕnikang daṇḍacāpa| lumpasakĕn ikang prayogasandhi| makahlar ikang samyagjñāna| makalaras ikang brata| tapa| yoga| samādhi||0// 43

nihan sang prayogasandhi| kengĕtakna| prayogasandhi ngaranya| upāya lwirnya| āsana| prāṇāyāma| pratyāhāra| dhāraṇa| dhyāna| tarkka| samādhi| manāpusāpus ika kabeh| sandhi ngaranya| ikang cetana juga wehĕn prakāśa mangekatwa| tan parorwa ngadĕg| hĕmĕng tan paḍĕm| māwak ing caturdhyāna| caturdhyāna ngaranya| lwirnya| tiṣṭhan| bhojan| gacchan| suptan| tiṣṭhan| bhaṭara malungguh| bhojan| bhaṭara mangan| gacchan| bhaṭara lumaku| swaptan| bhaṭara maturu| sangkṣepanya| bhaṭara juga katuturakna| sapolah bhāwa ning wwang| apan ikang tutur ngaranya| yeka paśarīran bhaṭara mangke ring sakala|| muwah hana tāsana ngaranya| lwirnya| padmāsana| wajrāsana| paryyangkāsana| swastikāsana| widyāsana| daṇḍāsana|| nahan ikang āsana| nĕm prabhedanya| tunggal awaknya| ya ta pilihana palungguhana| sang mangabhyāsa prayogasandhi| tlas pwa sira malungguh| ya ta sira umimpĕnakĕn sang hyang urip| petĕn ring ekacitta| tlas kempĕnan sang hyang urip| maprāṇāyāma ta sira| hana wāyu pamasĕh ngaranya| lwirnya| recaka| pūraka| kumbhaka| recaka ngaranya| wĕtwaknekang wāyu rumuhun sangkeng tutuk| hĕntekna| muwah tngĕn kuñcīnĕn| patguhĕn| sakla ring anguñci| muwah ispĕn ikang wāyu| yeka pūraka ngaranya| kumbhaka ngaranya| ri tlasnyāngisp ikang wāyu| pgĕngĕn| kuñcīnĕn patguhĕn| sahulihing anguñci| wijilakna ring netradwāra| yapwan tan abhyāsa| wijilakna ring irung| mahalona hayeki [G: iritirita yeki] numbĕk| ping pitu diwasa ning anguñci| yan anghĕl taharrāyyana| tuhun ikang kuñcī haywa tumular| don ikang prāṇāyāma| ginawayakĕn ring tduhaning rajah| tamah| ri prakāśa ning sattwa| nguniweh haywa ning śarīra towi|| muwah hana ta kuñcī lyan sakerika| tan pamĕtwakĕn wāyu| sangkṣepanya| humnang juga| nlan gugusika recaka| kumbhaka| ika rumuhun| yatanyan gawayakna ikang kuñcī rahasya| sangkṣepanya| ikang cetana juga welĕn prakāśa| andĕlakna ring kadalīpuṣpa| ya pwanenakanḍĕl nira ngkāna| karĕngö tikang hati sahĕnĕb| wrustakeng ring antahkaraṇa| ndah yatika sinangguh mamūjākĕn prāṇasandhi la jāti| ngaranya| yeka pūjājāti ngaranya| sĕmbah hyang alit| yapwan mangkana tīkṣṇa dening asamādhi| wyakta hilang ikang wāyu gaṇal| māti līna ri sangkanya| apan tañcinetana dening ātmā| nahan mārgga kuñcī rahasya ngaranya|| 44

muwah hana ta pratyāhārayoga ngaranya| ikang indriya kabeh watĕkĕn sakeng wiṣayanya| kinĕmpeling citta buddhi manah| tan wineh maparanparana kinĕmpĕling cittālila| yeka pratyāhārayoga ngaranya|| ikang jñāna tan parorwa| tan pawikāra| enak tikang hnanghningnya| umiḍĕng tan kāwaraṇan| yeka dhyānayoga ngaranya|| tutup ikang dwāra kabeh| irung tutuk| talinga| wāyu rumuhun isĕpĕn| wĕtwĕn ikang wunwunan| kunang tan pabhyāsa ikang wāyu winehadalana ngkāna| dadi adalaneng irung| halon wtu ning wāyu| yeka prāṇāyāmayoga ngaranya|| hana oṃkāra śabda mungguh ring hati| yateka dhāraṇān| ya pangilang ikang kaṛngö| ri kāla ning yoga| ya teka śūnya ngaranya| śiwātmāwak bhaṭara śiwa yan mangkana| yatika dhāraṇayoga ngaranya| ndākāśa rakwa sang hyang paramārtha| ndan palenanira sakeng ātmā| tan hana śabda ri sira| ya ta kalingan ing paramārtha| palenanira sakeng awangawang| paḍa nirekangalilang| yeka tarkkayoga ngaranya|| ikang jñāna tan pangupekṣa| tan pangalupa| tan ana kahaṛp nira| tan ana sinādhya nira| malilang tan kahilangan [prob: kalilangan]| tan kāwaraṇan| tan pawastu ikang cetana| apan mari humiḍĕp ikang śarīra| luput sakeng caturkalpanā| kinawruhan| mangawruhi| mangdewruh| ikang caturkalpanā ngaranya| ika ta kabeh| tan hana ri sang yogīśwara| yapwan enak palungguh nikang citta hning| yeka sinangguh mulih ring ambĕk ngaranya| yeka pūrwwa ning cetana pinratiṣṭha| linungguhakĕn ing ambĕk ngaranika yan mangkana| kapingro ning tutur pinahayu| kumwa pwa lingnya| ikang ambĕk ya ta waluyakna pramāṇa| umapa dening umaluyakna kang ambĕk pramāṇa| nihan ikang citta buddhi manah| juga watkĕn wehan makāwakang tutur prakāśa| sphaṭikopama| kadi maṇik sphaṭika| yapwan enak tīkṣṇanya| yeka sinangguh sphaṭikajñāna ngaranya| yapwan enak prakāśa dilah sang hyang sphaṭikajñāna| gsĕngĕnira ikang sarwwatattwa| lawan śubhāśubhakarmma| apa dening gumsĕngan śubhāśubhakarmma| mwang sarwwatattwa| nihan pih| sang hyang sphaṭikajñāna juga lunguhakna ring brahmasthāna| yapwan enak andĕl nira ngkāna| gsĕng bhasmībhūta kahiḍĕpan ikang sarwwatattwa mwang śubhāśubhakarmma| yatika sinangguh mamūjā| mahoma ring kuṇḍajāti ngaranya| umĕntyakĕn ikang sarwwakleśa kabeh| yeka sinangguh dhāraṇayoga ngaranya|| 45

kapingtiga ning cetana pinratiṣṭha| kumwa pwa lingnya| ikang oṃkāra praṇawa hana ring hṛdaya| yata līnākna ring śiwatattwa| kalinganya| ikang citta pih| luputakna sangka ring anggapradhāna| wehĕn mangekacitta ring śūkṣma juga| makāwaka ng tūryyapada n don mengĕt wruh sira wiśeṣa| lmĕng dumling tan paḍĕm| kadi lakṣaṇa ning pañjut haneng jro ning dyun| tan polah| tan kḍĕk| lmĕng mangadĕg| juga mangekacitta lwira jñānanta| makāwak ḷngang ning tutur| ri tlĕng ning sandhijñānanya| nda turunga taya tapwan turu| apan sḍĕng makāwakang jāgrapada ngaranya| mapanggih pwa kang jāgrapada| lawan tūryyapada| ḷyĕp tang watĕk dewatā| amiśra ring dhyāna| nda kaṣā [prob: ndākāśa] lyan tutur hiḍĕp sang hyang pradhāna| msut sangka ring anggapradhāna| ya sinangguh abhisandhi ngaranya| papasah ning pradhāna| lawan puruṣa| anganti ring patajya ning tutur mwang lupa| sang hyang ātmā yan mangkana| ya ta sinangguh muwah dharmmawiśeṣa ngaranya| makāwak wāsanā nikang saptāngga| saptāmṛta| inandĕlan ta sira dening saptāgni|| saptāngga ngaranya| puruṣa| sattwa| rajah| yamah| buddhi| manah| ahangkāra|| saptāmṛta ngaranya| śabda| sparśśa| rūpa| rasa| gandha| kinawruhan| sinangkalpa|| saptāgni ngaranya| manon| mangṛngö| mangrasa| mangambung| mangaku| mamastwani| mamikalpa|| yan kawruhan ikang saptāngga| an pinakāwak de sang yogīśwara| yeka nimitta ni rāsana paripūrṇṇa śarīra nira| tan kneng wighna| tan kneng jarāmaraṇa|| yan kawruhan ikang saptāmṛta| an pinakahurip nira| yeka nimitta nira sang yogīśwara yauwana| tan paḍāyuṣa nira lawan janma samanya|| yan kawruhan ikang saptāgni| umndĕli sira| yeka nimitta nira sang yogīśwara| wnang sira wyāpi| wyāpaka| wnang sira sakāmakāma| mangke ri sakala| apan bhaṭara mahulun makangaran saptāgni| ya ta matangnyan sang hyang saptāgni panggsĕng nikang saptāngga| saptāmṛta| apan ika mangdadyakĕn upasargga| upasargga ngaranya| wāsanā nikang triguṇa| rumakt ing śarīra ning ātmā| nihan dṛṣṭopama| kady anggan ikang dyun wawan hinggu| alawana hinggunya sangkerikang dyun| wasĕhanekang dyun pahalilangĕn| ya yatah mambĕk juga kang linggu irikang dyun|| iwa mangkana ta wāsanā ning triguṇa| rumakt ing śarīra ning ātmā| an tar wawang hulang dening samādhi| tambayan| ya ta gsĕngan de sang yogīśwara| ndya kari lwir nikang upasargga nihan|| 46

yapwan hana katon kadi gandharwwa| hana kadi widyādhara| ya ta manungsung ri sang yogīśwara ri kāla ning yoga| muwah hana ta marūpa dewatā| manungsungi singhāsana mās| manon malungguha ri sang yogīśwara muwah hanona ṛṣi ḍaṭĕng| mamūjā ring puṣpawarṣṣa| athawi umawa harttha ning aji| ndan ahajara kunang sang yogīśwara ri kāla ning yoga| sattwopasargga kapanggih de sang yogīśwara yan mangkana|| kunang yan katon| kadīnuntitakĕn| kadīnayun| kadīnulahulah| hana kadi binongbong| hana kadi manglayang ring ākāśa| kunang awak sang yogīśwara ri kāla ning yoga| atawa don dānawa| kunang daitya| rākṣasa| umalangi samādhi sang yogīśwara| rajopasargga ika yan mangkana|| kunang yan abyĕt awak sang yogīśwara ri kāla ning yoga| atawa kagyatahumaras kumtuga| gĕgĕngĕn rumabmuriring| hana kadi pintĕkĕn ring hatĕn| hanan malupa wiparīta| kadi hilang ikang cetana| ri kāla ning yoga| prayatna turu sanghulun| tamah ika kapanggih de sang yogīśwara yan mangkana| nguniweh yan matmu ri yanta ning yoga| kunang ikang upasargga| bhaya n kita yan mangkana| hana gawe hala ta pwa n bhinukti| phalanya kalinganika| ata prihĕn gsĕngana de sang yogīśwara| wangunĕnirekang samādhi| muwah sang hyang saptāgni| igapi nira| wehĕn prakāśa ikang samādhi| makāwakang tutur sarwwajñā| sarwwakāryyakarttā| yapwanenak dilah sang hyang saptāgni rikang samādhi| gsĕng bhasmībhūta kahiḍĕpan ikang upasargga| kawkas tāwak sang hyang saptāgni rikang samādhi| gsĕng bhasmībhūta kahiḍĕpan ikang upasargga| kawkas tāwak sang yogīśwara| alilang ahning nirāwaraṇa tan patalutuh| kadi lilang ning ākāśa| yeka sinangguh tarkkayoga ngaranya|| 47

waluya ring antawiśeṣa| ika sang hyang ātmā yan mangkana| waluya sayodya lawan bhatara sadāśiwatattwa| muwah sarwwajñā| sarwwakāryyakarttā| jñānaśakti| wibhuśakti| prabhuśakti| kriyāśakti| luput sangkeng karmmawipākāśaya| ikang sadāśiwatattwa| karmmawipākāśaya ngaranya| karmma ngaraning gawe halahayu| wipāka ngaranya| ratĕng phalanya bhinukti ring śarīra| āśaya ngaranya| śeṣanya bhinukti| ya teka rumakĕt ing ātmā mamangun karmma muwah| ya ta sinangguh wāsanā ngaranya| yan ahala wāsanā nikang karmma ngūni| mogha mahaṛp magaweha hala ikang wwang denya| yan ahayu wāsanā nikang karmma ngūni| mogha mahaṛp magaweha hayu ikang wwang denya| tan hana pweka kabeh| rumakĕt ing ātmā| yeka luput sangkeng karmmawipākāśaya ngaranya| sinangguh riya| aliwat sangkeng halahayu| ikang sadāśiwatattwa| nahan kapingpatang cetana pinratiṣṭha linungguhakĕn|| kapinglima ning cetana pinakahayu| kumapwa lingnya| sang hyang wiśeṣa| maluyaknāntawiśeṣa| mapa dening umaluyakna sira ring anantawiśeṣa| nihanta tūryyantapada| juga pinakāwak dening samādhi| tūryyāntapada ngaranya| luput sangkeng rwa| rwa ngaranya| tan hana| tan taya| kalinganya| achedyāchedya| alit sakaring alit| sūkṣma sakaring sūkṣma| luput sakaring para wyāpāra| mari sarwwajñā sarwwakāryyakarttā| kewala niṣprayojana juga tan laku| tan hili| tan limbak| tan polah| asthiti umiḍĕng juga| yeka sinangguh samādhiyoga ngaranya| apan samādhi ngaranya pinakāpusapus ning sādhana kabeh| nahan kasthityan bhaṭara sadāśiwatattwa| yeka sinangguh maluya ring antawiśeṣa ngaranya|| 48

yapwan mangkana lwir nikang samādhi| kapangguh de sang yogīśwara| wyakta sira makadṛbya kāṣṭaiśwaryyan mangke ring sakala| mapa sinangguh kāṣṭaiśwaryyan ngaranya| manunggung sāmpun manĕmwakĕn yogawiśeṣa| hana kasiddhyan ngaranya| lwirnya nihan| aṇimā| laghimā| mahimā| prāpti| prākāmya| īśitwa| waśitwa| yatrakāmāwasāyitwa| aṇimā ngaranya| ikāwak sang yogīśwara| gaṇal tambayan| wkasan alit| sūkṣma| ya ta matangnyan sang yogīśwara wnang saparanira| tan katahan sira dening gunung watu| wnang ta sirāsilurup ing lmah| tan hana maḍana kaiśwaryyanira| yeka sinangguh aṇimā ngaranya|| laghimā ngaranya| ikāwak sang yogīśwara| abyĕtambayan| wkasan aḍangan kadi kapuk| ya ta matangnyan sang yogīśwara ambara mārgga| anampak gagana| majalāntara| wnang manampak wwai| yeka kaghimā ngaranya|| mahimā ngaranya| mara sira ring deśāntara| pinūjā sinĕmbah sira kinabhaktyan sira| saparanira tan ginulangulang| yaika sinangguh mahimā ngaranya|| prāpti ngaranya|| nda sakahyunirekang wastu| tan ulihi nganghel| yeka prāpti ngaranya|| prākāmya ngaranya| wnang ta sirāgawe rūpa nira dady anom| dady atuha| dady alanang| dady awadon| wnang ta sirāmasuki ng jñāna| irikang rāt kabeh| yeka sinangguh prākāmya ngaranya|| īśitwa ngaranya| mara sira maring swargga kahyangan| pinūjā inarccana sira dening watĕk dewatā kabeh| atawi wnang sira umadĕh ikang watĕk dewatā| ri kahyanganira| tan hana dewatā sumikareng sira| apan bhaṭara mahulun hana ring awak sang yogīśwara| yeka sinangguh īśitwa ngaranya|| waśitwa ngaranya| tan hana wnang langghana sawuwus nira| tan kahalangan sira ring sakecchā nira| yeka sinangguh waśitwa ngaranya|| yatrakāmāwasāyitwa ngaranya| wnang ta sira tumimbah ikang watĕk dewatā| īśa tmahanya| tan hana wnang langghana sawuwus nira| tan kahalangan| sawalen wnang ta sira sumapa dewatā| mangdadya mānuṣa| yan langghyāna ri sira| yeka sinangguh yatrakāmāwasāyitwa ngaranya|| 49

nahan tang sinangguh kāṣṭaiśwaryyan ngaranya| cihna sang sāmpun manĕmwakĕn yogawiśeṣa| apan tan hĕḷm ngaranya| ri tka ning pāti| kang sinangguh kalpasĕn ngaranya| mangke juga katona cihna nira| sang amanggih kalpasĕn ngaranya| apan tan kawnang sinilingakĕn sang sāmpun cihna| manĕmwakĕn yogawiśeṣa|| apa dumeh sang yogīśwara| tan wawang lpas| apan sāmpun ngaranika sira mamangguhakĕn yogawiśeṣa| atawi lyan wnang ta sira wyāpī wyāpaka mangke ri sakala| wnang ta sira tuminggala urip nira| tuminggalakna anggapradhāna| tan hana kapwa karmma rumakĕt ri sang yogīśwara| apan tlas ginsĕng nira ika kabeh ri kāla ning yogapada| ya ta matangnyan tan hana karmma rumakĕt ri sang yogīśwara|| sugyan mangkana linga sang para| nda wāsanā nikang rajah tamah ngaranika| tlas ginsĕng nira ngūni ri kāla ning yogapada| wāsanā ning sattwa yeka mangaweśa ri sang yogīśwara| apan jātinya n rakwa mangkana| apan phala nikang buddhi sattwa rakwa pangilang sang yogīśwara| ri phala ning buddhi rajah| maḷs ta phala ning buddhi sattwa| pinakāwak de sang yogīśwara| wkasan ya ta bhinukti de sang yogīśwara| inĕntyakĕnira pĕpĕdanya| winimba jaya pinawolunira| wineh nira makāwakang kāṣṭaiśwaryyan| yapwan hĕntya wāsanā nikang sattwa bhinukti de sang yogīśwara| irika ta yan mapasah ikang pañcamahābhūta| mulih ry asthiti nira sowangsowang| mangkana sang yogīśwara| mengĕt matutur juga sira| mulih sayodya śarīra| lawan bhaṭara paramaśīwatattwa| makasādhana ng prayogasandhi| makabhūmi brata| tapa| yoga| samādhi|| 50||

iti sang hyang tattwajñāna| sang hyang prayogasandhi| parisamāpta|| om|| makasuluh samyagjñāna|| om||